Shillong, Naiwieng 05: Ki samla pule ka skulbah North Eastern Hills University (NEHU) Shillong mynta ka sngi ki la pynbna syndon ban pynlong da ka jingshong shah thngan kaba khlem pud sngi bad ruh ban khang dam ia kane ka skulbah naduh ka 6 tarik u Naiwieng 2024.
Ia kane ka jingpynbna, la pynbna da ki samla pule hapoh ka ka shatri jong ka NEHU Student Union (NEHUSU) lyngba u general secretary Samla Tonyho Kharsati hadien ka jingiakynduh ia u Vice Chancellor ka u Prof PS Shukla.
Lah ban kdew, ba ki samla pule ka NEHU lem bad ki samla pule kiba don hapoh ka Khasi Students Union, NEHU Unit ki la pynlong da ka jingiaid paidbah mynta ka sngi kaba la sdang naduh ka State Central Library haduh ka Administrative Block ban aiti biang ia ka dorkhas ha u VC ka NEHU ban pynurlong ia ki mat jingdawa ba la shu pynsahteng mynta la katto katne snem.
Ki mat ki kynthup ka jingrem ka bai Hostel, ka jingbym biang ki Hostel, ka jingdawa ban weng kam ia u Registrar, Deputy Registrar bad kiwei ki ophisar ba shu thung beaiñ da u VC ka NEHU bad ban dawa ban thung mardor ia u Pro-Vice-Chancellor.
U samla Tonyho Kharsati, u la iathuh ba hadien ka jingiai pynbor da ki samla pule ka NEHU ba u VC u la treh ban ia kynduh ia ki, hynrei namar ba um shem la ai kano kano ka jingkular ne ka jingshai halor ki jingdawa ba la dawa da ki samla pule naduh u snem 2022, kumta ki samla pule ki la shim ia ka rai ban shong shah thngan bad ban khang dam ia kane ka skulbah NEHU naduh ka 6 tarik Naiwieng.
“U VC u long u bym don kano kano ka jingtbit ne jingtip halor ki jingeh ba la mad da ki samla pule watla ki la dep ai da ki dorkhas naduh u snem 2022, kaba la pynbitar ia baroh ki samla pule kumta ban shu mad ia kijuh shi kijuh ki jingeh, ki samla ki la shim beit da kane ka rai ba tyngeh ban dawa weng noh ruh ia u Vice Chancellor”, ong u samla Kharsati da kaba bynrap ruh ba ai ba ka sorkar jylla kan shimkhia halor kane ka jingiakhih ki samla pule.
Na ka liang u President ka Khasi Student Union (KSU) NEHU Unit, u samla Shibaitlang Rymbai, u la iathuh ba ka seng hi kaba ieng ha ka nongrim kaba skhem kan nym kynrandien hynrei ban pynlong beit ia ka jingiakhih da kaba shah thngan khlem pud sngi tad haduh ban hiar shuki u Vice Chancellor ka NEHU.
“Kane ka jingiakhih ba mynta kam dei tang namar ba mad jingeh ki samla pule khasi khara hynrei ka dei kaba la mad da baroh ki samla pule ha kane ka skulbah kumta ka long kaba donkam ba baroh ki Samla pule kin ia snohktilang ha kane ka jingiakhih”, ont u samla Rymbai.
