Nongpoh, Naiwieng 5: Da ka jingkmen kaba khraw ba kum ka kynhun jong ki longkmie kaba la tip kum ka Kyntiewlang Village Organization kaba kdup ruh ïa ki 7 tylli ki SHG’s jong ka shnong Korstep Nonglyngdoh, mynta ka sngi 4 tarik Naiwieng ka la pynlong ïa ka jingrakhe kaba iphuh iphieng ïa ka jingdap 4 snem haka jingïaid lynti kum ka VO ban ai ïaka jingshakri na ka bynta ka imlang ka sahlang.
Ïa kane ka prokram ba la pynlong ha ka shnong Korstep Nonglyngdoh, Ri Bhoi District, la wan ban ïa pynshit pynshngaiñ ïa kane ka jingrakhe jong katei ka VO da u Bah Mayralborn Syiem MLA ka Nongpoh kum u kongsan haka jingdon lang u Bah Balajied Ranee MDC Nongpoh, Kong Veronika Syngkli President Kyntiewlang Village Organisation Korstep Nonglyngdoh, bah Andreas Makri Rangbah Shnong Korstep Nonglyngdoh, Bah Isaïa Syngkli Rangbah Shnong Korstep Nongtluh lem bad ki Dkhot naka Synroplang Village organisation Korstep Nongtluh.
Haba ai jingkren naka liang u bah Mayralborn Syiem kum u kongsan ha katei ka jingialang kaba la long ha katei ka shnong, u ai ïaka jongïaroh ïaki nongialam jong ka Kyntiewlang Village organization ki ba la lah ban pyntyllun ïaki kam mynta la 4 tylli ki snem khlem da don kano kano ka jingnoh shilliang khmat. U la ïaroh ruh ïaki dkhot jong ka VO bad kumjuh ïaki dkhot jong ki 7 tylli ki SHGs ki la ïa snohkti tylli lang ban ïa kyntiew iwei ïa iwei khlem da don ka mynsiem ia bishni.
Ka jing lah ban long kawei ha ka jingpyn tyllun ïaki kam jong kano kano ka kynhun ka long ka bynta ka ba khraw eh bad kaba donkam eh khnang ban ïoh ïa u soh jong ka jingjop, Ong u bah Mayralborn ha katei ka sngi. U la pynpaw ruh ïaka jingïaroh ïaki dkhot jong ka VO bad SHGs ki ba la long shisha kiba kloi ban ïa tylli haba don ki kam hapoh ka shnong ka thaw.
U Bah Mayralborn, u la kyntu ruh ïaki dkhot baroh jong ka VO bad SHGs, Nalor ki kam kiba bha kiba ki la leh hapoh ka imlang ka sah lang bad hapoh ka shnong, ki dang dei ruh ban nang pynkhraw bad nang ïai trei shitom shuh shuh ïaki kam bad ban nang wan rah shuh shuh ki kam kiba kham pher hapoh ka shnong ka thaw.
