Shillong, Naiwieng 05: Ka Chairperson jong ka Meghalaya State Commission for Protection of Child Rights, ka Agatha K. Sangma, ka la ong ba tang da ka jingkitkhlieh lang jong baroh kaba kynthup ia ka sorkar bad ka kynhun ki paidbah yn lah ban thaw ia ka jaka ba shngain na bynta ki khyllung ha ka imlang sahlang.
Ia kane la pynpaw da ka MP barim jong ka Tura ka Agatha Sangma, kaba la shah thung kum ka Chairperson jong ka Meghalaya State Commission for Protection of Child Rights naduh ka 9 tarik Nailur, hynrei namar ki daw ba iadei bad ka jingkoit jingkhiah, ka la shimti ia kane ka kam ha ka sngi Ba-ar.
Haba kren bad ki nongthoh khubor, ka Chairperson kaba thymmai ka la ong ba ka long kaba sngew kmen shibun ban shimti ia kane ka kam namar ba “ki khyllung ki dei kiba ka ieid eh ha pyrthei.”
“Nga sngew kmen namar nga sngewthuh ba dang don shibun ki kam kiba donkam ban leh, shibun ki kam ba ka Commission ka la leh, kiba nga kyrmen ba ngan lah ban pynbha shuh shuh ia kj jingdonkam jong ka Commission,” la ong ka Sangma.
Ha ka sngi nyngkong jong ka ha ophis, ka Sangma ka la ia kynduh ia u Myntri uba peit ia ka Social Welfare, u Paul Lyngdoh, ban ïakren halor ki mat bapher bapher kiba iadei bad ka Commission.
Ka Sangma ka la khamphang bha halor ka jingdonkam ban pynshngain ia ki khun, da kaba ong ba mynta ki don bun ki jingjia kaba iadei bad ki kam sniew pyrshah ia ki khyllung khynnah namar ki longïing jong ki bad ki kynhun ki la khring jingtip shuh shuh halor kane ka bynta.
Ka la pynpaw ruh ba ki don bun ki rukom ai jingiarap ia kiba shah iuhroit bad ka dei ka jingkitkhlieh jong ka Commission ban iarap ia ka jingpynbeit ia kitei ki jingeh.
“La donkam ba ki imlang sahlang, ki kmie ki kpa, ki nonghikai baroh ki dei ban pynshai jingmut bad trei lang ban pynlong ia ka jaka sah jong ki khun kaba shngain,” ka la bynrap.
Shuh shuh, ka Sangma ka la ïathuh ba ka Commission kan thoh sha ka sorkar ban kyntu ia ka sorkar ban pynmih noh ia ka fast-track court na ka bynta ki kam sniew pyrshah ia ki khyllung khynnah.
