Nongpoh, Naiwieng 07: Ki nongialam shnong ka thaiñ Sakhoikuna bad Umdap lem bad kiwei ki Shnong lyngba ka Joint Action Committee Umdap Areas mynta ka sngi ki la leit ban ujor sha u Executive Engineer ka tnad PWD Road Nongpoh Division halor ka jingieh shrah da u Kontraktor ba 5 kilometre na ka skhim PMGSY ba la mang naduh Pahammawlein sha Sakhoikuna ha Ri Bhoi District.
Ka JAC Umdap areas ba la lamkhmat da u Bah Lawrence Nongrum, kum u Chairman ha ka jingiasynranlang ruh da ki riew rangbah, ki longkmie bad khun samla ki la ia kynduh ia u EE ka tnad PWD Road u Bah M Pyrbot bad la dawa na u ba un shimkhia mardor ban phah trei pyndep ia u tei u surok u ba la pynsonsat ia ki paidbah nongleit nongwan.
U ne u surok PMGSY u ba don kumba 5 kilometre u dei u surok ba kongsan u ba pyniasoh ia ka shnong Umdap Rngi, Umdap Dimu, Pahamsohbar, Umjong, Khongwing bad Shakoikuna ki pyndonkam ia ka u ba pyniasoh ruh sha Marmain bad shaduh Byrnihat.
Ha ka jingkren jong u Bah Lawrence Nongrum, u la pynrem jur ia u Kontraktor ba la tip kyrteng kum u Sunshine Sawkmie, u ba la shu ieh noh khlem pyndep ia ka jingtei ia u ne u surok wat hadien ba la pynjot pynpra ia ka rong na u surok rim bad ban pynsohsat kylla ia ka leit ka wan ki nongshong shnong khamtam ki nongrep bad ki khynnah skul.
U la ong ruh, ba u ne u surok na Pahammawlein shaduh Sakhoikuna u long u ba kongsan bha ia ki paidbah kiba la dap da ka jingkmen ban ioh ia ka jingtei thymmai lyngba ka skhim PMGSY hynrei ka jingkmen ka la kylla khongpong noh namar la shu iehnoh shrah da u Kontraktor u ba la ioh ban pyntrei ia u ne u surok.
Na ka liang ka JAC Umdap areas, ka la ai por syndon shitaiew ia u Kontraktor ban sdang pyntrei noh ia ka jingtei ia u ne u surok lem kumta ka JAC kam banse ban shim da ki lad ba tyngeh pyrshah ia u tei u Kontraktor.
Na ka liang kawei ka longkmie, ka la ther tyngeh ba lada u tei u Kontraktor um lah ban trei ia u ne u surok u la dei ban aiti noh sha kiwei kiba lah ban trei ym ban shu pynsohsat pynban ia ki paidbah nongshong shnong kiba donkam bha ia u ne u surok.
