Jowai, Naiwieng 08: Uwei na u u MDC na ka Jaintia Hills Autonomous District Council na ka Jowai North Constituency u Bah Brightstar Chyrmang, u la kyntu jur ia ki para MDC ba kin mih sha surok na ka bynta ban talasi ia baroh ki trok kiba iaid ha ka surok, ka ban long kum ka jingtehlakam ia ka jingshalan tuh ia u dewiong na rilum Jaintia ha kaba ka la ktah jur ia ka pla tyngka ka sorkar jylla bad wat ia ka Jaintia Hills Autonomous District Council (JHADC).
Na ka liang u Bah Brightstar u la pynpaw ia kitei ki kyntien da kaba ai jingkyrshan ia ka Motion ba la wan rah da u MDC ka Jowai Central u Bah Andrew Shullai ha ka Dorbar Tlang ka JHAC kaba la long ha ka sngi Palei mynta jong ka taiew.
U la ong ruh ba u dewiong u dei marpoh khyndew uba ha khmat eh u ba ai shibun bah ka khajna sha ka Sorkar Jylla bad sha ka JHADC, hynrei ka long pat kaba sngewsih bad sngewkhia ban iohi ia ka jingtih dewiong beain bad ka jingshalan dewiong beain na ka Ri Lum Jaintia.
Ha ka jingwan rah ia katei ka Motion, u Bah Shullai u la kynthoh jur ia ka Executive Committee ka JHADC kaba ym shim la shim kino kino ki lad ki lynti kiba thymmai ban pynmih pisa ne khajna ia ka Council bad kumba long mynta ka Executive Committee ka shuh ap khmih lynti ban ioh pisa tang na ka Sorkar Jylla.
U la bynrap ruh da kaba ong ba ka JHADC ka dei tnat shimet kaba don bor ban thaw ki lad ki lynti ban pynmih pisa ialade hynrei kumba long mynta ka Executive Committee kam shym la shim kino kino ki lad ki lynti kiba thymmai kumno ban pynmih pisa bad ka JHADC mynta ka kylla long kum ka tnat kaba rit jong ka Sorkar Jylla.
Shuh shuh, haba kyrshan ia katei ka motion bala wanrah da u Bah Shullai, u MDC jong ka Shangpung u Bah J. Treilang Suchiang u la kynthoh ba ki karkhana shna cement kim ai satia kano kano ka jingiohnong ia ka JHADC kumba dei ban long bad ban ioh jingmyntoi ka JHADC.
