Shillong, Naiwieng 07: Ban pyntikna ba ka jingiakhih khang khyrdep ia ka skulbah North Eastern Hills University (NEHU) lane ka total lockdown, ki samla pule kane ka skulbah ki la leit ban khang syndon da ki tala ia ki khyrdop ban rung shapoh ka skulbah kynthup naduh Gate 2, Gate 3 haduh Gate 5.
Lah ban kdew, ba ka jingiakhih ki samla pule da kaba khang khyrdep ia ka skulbah bad ban shah thgan khlem pud ba la pynlong da ka NEHUSU bad ba la kyrshan ruh da ka KSU NEHU Unit ka la jam mynta sha ka ar sngi.
Ka jingiakhih ka la long halor ka jingleh bym suidñiew da u Prof PS Shukla Vice Chancellor kane ka skulbah ban sngap ne pynurlong ia ki mat jingdawa ba la wanrah da ki samla pule ba kynthup naduh ka jingdawa hiar shuki ia u VC ban wengkam ia kito kiba la shu thungkam sopsop bad kiwei kiwei.
La sakhi ruh, ba kane ka jingiakhih shong shah thngan kaba la kynjoh ar sngi mynta la don katto katne ngut ki dkhot ka NEHUSU bad KSU NEHU Unit kiba la sdang khie tlot bad ki la ioh ia ki drip.
Na ka liang u VC dang ha ka 6 tarik Naiwieng, u la pynksan ba um treh ban hiar shuki ne wat ban wengkam ia kito ki ophisar kiba la thungkam ha NEHU kaba la nang pynbitar ia ki samla pule.
