Nongpoh, Naiwieng 08: U wei u Dribar jong kawei ka trok, u la khlad noh hashen, kaba dei hadien ba katei ka trok kaba u niah ka la kylla ha ka surok NH-6 ha Ri Bhoi ha ki bynta jong ka surok Umsning By-pass. Ka long ruh kaba sngewlyngngoh ba katei ka trok kaba kit ia ki niut bad ki jaboh ka wan na Guwahati bad ka thmu ban leit pynhap sha rilum Jaintia bad kine ki kam kit ia kitei ki jaboh ban wan pynhap sha Meghalaya ka la paw noh hadien ba katei ka trok ka la kylla ha katei ka surokbah ha Umsning By-pass.
Une u dribar ba la khlad noh ha katei ka jingjia la tip kyrteng kum u Dawni Dkhar ba sah ha Madur East Jaintia Hills bad u nongbud ba la mynsaw la tip kyrteng kum u Ericson Swer na Ummulong, West Jaintia Hills.
Kumba la ioh lum jingtip, la ong ba kane ka jingjia ka la jia mynta ka sngi ha ka por 2 baje ei ei noh phai sngi, ha kaba katei ka trok kit niut kaba don ia u number AS-01-RC-0613, ka dang wan na Guwahati ban leit sha rilum Jaintia bad kane ka jingjia ba sngewsih ka la jia hadien ba la poi ha katei ka jaka kaba dei na ka jingpynher sted ia ka trok kaba la ryngkang ia ka jingker ka surok bad leit kylla pat sha kawei ka surok.
La ong ruh ba ia utei u dribar ba la khlad noh la pynkit noh sha Civil Hospital Nongpoh ban pyndep ia ka postmortem examination bad utei pat u nongbut ba la mynsaw la rah noh sha CHC umsnign ban ioh ia ka jingsumar.
Na ka liang ki Pulit ka Umsning Police Station hadien ba la ioh jingitp ki la leit mar mar sha katei ka jaka ban sei noh ia u Dribar ba la sahkut da ka jingban ka trok ba kylla bad ruh ban pynlong ia ka jingtohkit kaba bnia halor kane ka jingjia.
