Shillong, Naiwieng 14: Kum kawei na ka thong ban pynsuk ia ka leit ka wan ki paidbah lyngba ki Lingsuin bad ruh ban kyntiew ia ki kam jngohkai pyrthei lyngba kita ki lad ki lynti ba la tip kum ka ‘Water-Based Aviation’ ha ka jingpyntreikam ia ka RCS-UDAN scheme kiba dei lyngba kita ki Seaplane, ka tnad transport jog ka sorkar Meghalaya ha ka jingiatrei lang bad ka Ministry of Civil Aviation ka sorkar kmie mynta ka sngi ki la plie paidbah ia ka jingpynirong ba la tip kum ka Sea Plane Demonstration haUmiam Water Sports Comple.
Ha kane ka prokram ban pynpaw paidbah halor kine ki seaplane la don ryngkat u Ram Mohan Naidu Kinjarapu Union Minister of Civil Aviation, u Conrad Sangma myntri rangbah ka jylla Meghalaya, u Dy. CM ka jylla u Bah Sniawbhalang Dhar, u MLA ka Umroi u Bah Damanbait Lamare, ki ophisar na ka Civil Aviation bad na ka tnad transport ka sorkar jylla.
Na ka liang u Ram Mohan Naidu Kinjarapu Union Minister of Civil Aviation, u la ban khia halor ka jingdonkam ban don ka jingiatrei lang ka sorkar kmie bad ka sorkar jylla na ka bynta ban pynkhlain ia ka jingshakri ban pynsuk ia ki paidbah lyngba ki lad kiba ngi pyndonkam ia kita ki Lingsuin.
U la pynthikna ruh kane ka jingiatrei lang ka sorkar jylla bad ka sorkar kmie kan long kata ka lad kaba ki lah ban pyntreikam hok ia kata ka scheme UDAAN, kaba dei kawei na skhim ka sorkar kmie ba pyntreikam na ka bynta ki paidbah ha ka leit ka wan lyngba ki lingsuin.
Na ka liang u myntri rangbah ka jylla u Conrad K. Sangma u la pynpaw ia ka jingkmen ban don kum kine ki lad ki lynti ba lyngba kita ki jingdon kum kine ki Lingsuin kan iarap shibun ban pynsuk ia ki paidbah ha ka leit ka wan bad ruh ka long ruh ka lad ka lynti ba ka sorkar jylla kan lah ban kyntiew ia ki kam jnghohkai pyrthei kaba long ka jingmyntoi ia ki paidbah ka jylla.
U myntri rangbah ka jylla, u Conrad K. Sangma u la pynpaw ruh halor shibun ki lad ki lynti ba kyntiew ia ki kam jngohkai pyrthei ha kaba lada lah ban pynterikam ia kine ki Liengsuin Duriaw kan iarap ban kyntiew ia ka kam jngohkai pyrthei bad ruh ia ka ioh ka kot ki paidbah ha ka jylla. Ha kawei ka bynta u la pynpaw ruh kane kan pynsuk ruh ia ki paidbah ha ka leit ka wan ban nym bam ia ka por ha kum kane ka pyrthei kaba ki ia beh ia ki kam ki jam.
U la bynrap ruh ba ka sorkar jylla kan sa shim khia bad ruh ban ai ia ka jingiatrei lang bad ka sorkar kmie khnang ba kane ka jingpyntreikam ia kane ka skhim UDAAN kan long shisha kaba ai jingmyntoi ia ki paidbah ka jylla Meghalaya bad ha ki jylla shatei lam mihngi ka ri India hi baroh kawei.
