Nongpoh, Naiwieng 15: Ka party VPP ryngkat ki nongialam ha ka jinglamkhmat u Bah Ardent Miller Basaiawmoit mynta ka sngi ki la hiar ban leit jurip kynsan kynsan ia ka Conservation Training Institute (CTI) Byrnihat, kaba dei hadien ka jingkynnoh ba ka sorkar jylla ka don ia ka jingthmu ban pynkylla sha ka Industrial Area.
Ha kane ka jingleit jurip, nalor u Bah Ardent Miller Basaiawmoit kum u President ba rangbah ka Party bad uba dei u MLA ka Nongkrem la synrang lang ruh da ka jingdon lang u MLA ka Mawlai u Bah Brightstar Marbaniang, u MLA ka Mawrynkneng u Bah Heavingstone Kharpran lem bad kiwei kiwei ki nongialam ka VPP party na ka sengkmie bad na Ri Bhoi District.
Ha kane ka jingleit jurip, ki nongialam ka VPP ki la jurip ia ki jaka treikam bapher bapher, ki bynta bapher bapher bad kumjuh ruh ia ka rubber plantation kaba don ha katei ka CTI ha Byrnihat bad kumba ki la lap ne sakhi ki la pynpaw ia ka jingkmen ba ka don kane ka jaka kaba long ka jingai jingim ia ki paidbah ka thain Byrnihat lyngba ka jingrben jong ki khlaw ki btap khamtam ka Byrnihat kaba la tip kum kata ka jaka kaba jaboh tam ha ka lyer ha ka ri India.
Haba kren sha ki lad pathia khubor, u MLA ka Nongkrem bad u President ka VPP u Bah Ardent Miller Basaiawmoit, u la ong ba ka VPP da lei lei bad horkit hordang kan nym ailad ban pynkylla ia katei ka CTI sha kata ka Industrial Area.
U la ong ruh ha kajingshisha ka party VPP ka la dep ai jingthoh sha ka sorkar ban pyrshah bad ruh u la rah ia kane ka mat ha ing dorbar thaw ain ka jylla bad kumba long haduh kine ki sngi ka party VPP kam pat ioh kano kano ka jubab halor kane ka jingthmu ka sorkar ban pynkylla Industrial area ia ka CTI bad ruh ba ka thmu ban ran ia katei ka CTI sha Mawkhanu kumba la mih ha ki lad pathai khubor.
Shuh shuh, u la ong ruh ba ka party VPP kan ieng rangbah bad kan pyneh hi triang ban pryshah bad lada ka sorkar ka leh da ka bor, na ka liang ka party VPP ruh kam banse ban pyni da ka bor ryngkat ki paidbah ban pyrsha jur lada dei ban iaid da kano kano ka lynti ban ia pyrshah halor kane ka jingthmu ka sorkar.
Ha kane ka sngi, hadien ka jingjurip u Bah Ardent Miller Basaiawmoit ryngkat ki nongialam ki la kynduh ruh ia ki paidbah ha Byrnihat ban pynshai halor ka jingthmu ka sorkar ban pynkylla ia ka CTI sha ka Industrial Area bad u la kyntu ruh ia ki paidbah ba kin ieng pyrshah ryngkat ka party VPP na ka bynta ban pyrshah ia katei ka jingthmu ka sorkar ban pynkylla ia ka CTI sha ka Industrial Area.
