Nongpoh, Naiwieng 21: Ki bor pulit ka Ri Bhoi hadien ba la ioh pdiang ia ka jingujor ba la don uwei u rangbah ba la tip kyrteng kum u Melan Syngkli (46) snem ka rta naka shnong Umkhawai ba hap ha ka thain Jirang ba u leit ban siat da ka pistol ia u Bah Balwan Mawthoh, Bah Santosh Marbañiang bad ka kiaw jong u ka Kong Twilen Mawthoh, u la shah kem noh mynta ka sngi, kaba dei hadien ba ki bor pulit ki la leit ban khynra ha ka ingsah jong u.
Ia kane ka jingjia la pyntip da u Bah Tarmal Mawthoh sha ki bor pulit ka Ri Bhoi, ha ka 18 tarik mynta u bnai ba ki pulit ki la shim khia mardor ban tohkit bad dei lyngba ka jingtohkit ki bor pulit ba la ioh ban kem ia utei u rangbah uba thmu ban siat da ka pistol ia kitei ki 3 ngut.
Dei lyngba ka jingtohkit ki bor pulit ba la ioh ban kem noh mynta ka sngi ia u Bah Melan Syngkli bad la register case ha Patharkhmah Police Station katkum ka Case No. 02(11)2024 u/s 333/351(3) BNS r/ w Sec 25(1A) (1AA)(1B)(a) Arms Act. La iathuh ruh ba ki pulit ha ka jingleit khynra ki la ioh kurup kawei ka Pistol shna hi, 4 tylli ki kuli bad ba ka jingtohkit halor kane ka kam ka dang iaid shakhmat. Kane ka long katkum ka kyrwoh ba la phah da ka ophis u Superintendent of Police ka Ri Bhoi District.
