Nongpoh, Naiwieng 21: Kum kawei na ka sienjam ban ia thir ne ia tai sani halor ka kam rep ka kam riang, ki lad ki lynti ban iada kiba lah ban ktah na ka jingkylla ka suin bneng, ka Society for Biotic and Environmental Research (SBER), Tripura bad ka College of Agriculture, CAU (Imphal), Kyrdemkulai ki la pynlong da ka prokram kaba ar sngi lynter ba la tip kum ka ‘4th Biotic Science Congress, 2024, and International Conference on “Climate Smart Farming: Adoption, Impacts, and Implications for Sustainable Development” ba la pynlong ha College of Agriculture Kyrdemkulai ha Ri Bhoi District.
Kane ka prokram ba ar sngi ka la sdang mynta ka sngi bad kan kut noh ha ka 22 tarik u Naiwieng 2024, ha kaba ha kane ka prokram la shim bynta naduh ki Deans, directors, scientists, academician, ki nongrep, ki samla pule na kylleng ka ri India ban iatai halor kitei ki phang ba kongsan ba la buh kyrpang ha kane ka prokram ia tai ne ia thir sani ki riew shemphang ha ka rep ka riang.
Ia kane ka prokram la wan ban shim bynta da u Prof. Gautam Saha, Vice Chancellor jong ka BCKV kum u kongsan bad ka Kong Balakyntiew Ranee, Additional Deputy Commissioner ka Ri Bhoi kum ka symbut kongsan.
La sakhi lang ruh ha kane ka sngi da ka jingdon lang u Prof. Ram Singh, Dean ka College of Agriculture Kyrdemkulai, u Prof. Pranab Dutta, Chief Organizing Secretary, BioSCon, u Prof. D. Thakuria, Dean of the College of Postgraduate Studies in Agricultural Sciences and Convenor, u Dr. B. Chakrabarty, Executive Director ka Bangladesh Agriculture University, u Dr. M. Sehgal, Nodal Officer TSP and NEH ICAR-NCIPM, u Dr. P. K. Chakrabarty, Former ADG (PP & BS) bad kiwei kiwei ki riew shemphang halor ka kam rep ka kam riang.
Haba kren ha kane ka sngi, ka Kong Balakyntiew Ranee, ka Additional Deputy Commissioner ka Ri Bhoi District, ka la kham ban khia halor ka jingkordor ban pynim ia ka rep ka raing katkum ka juk stad ba mynta ka ban ai jingmyntoi ia ki nongrep, ka kam rep ka kam riang ka dei ban wan rah ia ka roi ka par bad ka jingkylla bad ruh ban pynthikna ba ngim dei ba duna ia ki marbam (Food Security) ha ka jylla bad ka ri.
Ka la kren ruh halor ka bynta ba ngi donkam ia kita ki lad ki lynti ba ngi rep ka ban ai jingmyntoi pateng la pateng bad ban poi sha kane ka thong ka kyntu naduh ki samla pule, ki noingrep bad ki riew shempang ba ki don lang kata ka jingiatrei lang khamtam ban pyntreikam ia kata ka rukom rep kaba dei katkum ka juk mynta (Smart Farming) khnang ba kan long shisha ka jingmyntoi ia ki nongrep bad ki nongshong shnong jong ka ri hi baroh kawei.
U Prof. Gautam Saha, Vice Chancellor ka BCKV, haba kren ha kane ka sngi, u la ban khia halor ka phang ka jingiapher jong ka jingkylla ka suin bneng ha ki jylla shatei lam mihngi ka ri India. U la kren ruh halor ka jingdonkam ban pyntreikam ia kita ki jaid jingthung kiba lah ban im wat hapdeng ka jingkylla ka suin bneng, ban pynbiang ia kita ki jaid jingbam kiba tei met katkum ka jingdonkam jong ka ri, ka buit treikam ban pynneh pynsah ia ki tyllong um bad ruh ban pyndonkam ia ki kor ki bor kiba dei katkum ka juk stad ba mynta khnang ba ngin lah ban pynmih ia ki jingbam kiba dei katkum ka jingdonkam u briew hapoh ka ri.
Ha kane ka sngi la sam ruh ia ki kynja khusnam kum ka jingpynhlur na ka bynta ki Scientist bad ki nongwan bniah (Researchers) kiba la pynlong ia ka jingwad bniah ha ki phang bapher bapher jong ka kam rem ka kam riang.
