Shillong, Naiwieng 24: Ka kynhun ialehkai ka Meghalaya, ka la rung sha ka wat ba khatduh jong ka 78th National Football Championships Santosh Trophy bad kata ka dei hadien ba ka la kut noh ha ka jingiakhaid kaba 1-1 ha ka jingiakhun kaba khatduh kaba la long mynta ka sngi ha Nalbari pyrshah ia ka Assam.
Ka kynhun ialehkai ka Meghalaya, ka dei kaba don ha ka Group-E, ha kaba la donlang ka Assam, Nagaland bad Arunachal Pradesh, kumta na katei ka group, dei tang ka Meghalaya kaba la ioh ia ka lad ban rung sha ka wat kaba khatduh, kata ka dei hadien ba ka la wan ha khlieh duh ka miej iakhein poin bad kaba la khur 7 poin na ki 3 sien iakhun.
Kumba ka long mynta, ha ki jingiakhun ha ki Group bapher bapher, ki kynhun na ki jylla kiba ioh ban iakhun sha ka wat ba khatduh, nalor ka Meghalaya, sa ka Jammu & Kashmir, ka West Bengal, Manipur, Odisha, Tamil Nadu, Kerala bad ka Rajasthan.
Kum ban shu kdew hangne, ba ka Meghalaya ka la rung sha ka Phainal ha ka Santosh Trophy jong u snem 2022/23 bad kiba la ioh ia ka kabu ban leit iakhun phainal sha Saudi Arabia, kata pyrshah ia ka Rajasthan, ha kaba ka Meghalaya ka la shah rem noh 3-2 hakhmat ka Rajasthan.
