Nongpoh, Naiwieng 25: Kumba la mih ka jingpyrshah kaba jur na ki nongshong shnong jong ki 3 tylli ki shnoing, kata ka Shnong Umpher, Amphanggre bad ka shnong Matchogre bad ha ryngkat ki kynhun seng bhalang bapher bapher ban pyrshah halor ka jingthmu ka sorkar ban wan rah ia ka Industrial Estate ha CTI, Byrnihat, u MLA ka Jirang Constituency u Bah Sosthenes Sohtun mynta ka sngi u la ai ka jingkyrshan ban ia pyrshah ia katei ka Industrial Estate bad ruh u la kyrpad sha ka sorkar jylla ba kan pynduh pyndam ia katei ka jingthmu ban pynlong ia katei ka CTI Byrnihat kum kata ka Industrial Estate.
Haba kren sha ki lad pathai khubor mynta ka sngi ha ingsah jong u ha Byrnihat, u Bah Sosthenes Sohtun, u la ong ba katei ka jingpyrshah ki paidbah bad ki seng bhalang ka long kaba don nongrim halor ka jingshah ktah ki paidbah na ki jingjaboh ba ki la mad baroh shi katta da ka jingdon ki Karkhana bapher bapher ha Byrnihat bad ban pyrshah ia kane u la dep ruh ban ai da ka jingthoh sha u Myntri rangbah ka jylla u Conrad K.Sangma ba ka sorkar ka hap ban bishar bniah khamtam ka ktah ia ki paidbah ba ka thain Byrnihat ka la ioh lypa iaka nam kum kata ka jaka ba jaboh tam ka lyer ha ka ri bad lada wan biang sa kitei ki Karkhana kan dang ktah shuh shuh ar shah ia ki paidbah ha katei ka thain.
“Ka sorkar jylla ka hap ban pyrkhat ia ka sur jong u paidbah ba bun ba lang bad ka hap ruh ban sangeh shuwa ia kane ka jingthmu ban buh da iatei ka Industrial Estate bad ka daw ka long ba ka la ktah palat ka jingjaboh kaba ktah ym tang ia ki paidbah bad ia ka mei mariang. Kum u MLA un dang buddien ruh ia kane ka jingthmu ka sorkar ban wan rah ia katei ka Industrial Estate ba kam dei ban urlong ba ki paidbah ki la pyrshah jur kumba la mih ha ki lad pathai khubor” u la ong.
U la ong ruh ba kum u MLA ym tang ba u la ai da ka jingthoh sha u myntri rangbah ka jylla, hynrei u la ioh ruh ba ia kren bad u myntri rangbah ban kyrpad na ka bynta ban nym wan rah ia katei ka Industrial Estate sha Byrnihat bad u la ai jingmut ruh ia u myntri rangbah ba lada kwah ban wan rah ia katei ka Industrial Estate dei ban rah noh sha Hima Jirang ba kum ka Hima ka la kloi ban pdiang ba kam don satia ka jingktah ia ki paidbah.
Shuh shuh, kumba u la dep ban ai jingmut hakhmat u Myntri rangbah ka jylla, u la kren ruh ba lada ka sorkar ka wan rah ia kano kano ka kam pynroi ban myntoi ka jylla, ka dei ruh ban sngewthuh ba kam dei ban don kata ka jingktah ia ki paidbah bad khamtam ha ka liang ka koit ka khiah. Ha kawei ka bynta ruh u la pynpaw ba kum u Nongmihkhmat paidbah u ai ka jingkyrshan ia ki paidbah kiba la pyrshah ha kaba la don ruh bun ki riew rangbah kiba la wan ban kyrpad na ka bynta ban nym shah ban wan katei ka Industrial Estate ha ka thain Byrnihat, u la bynrap.
