Nongpoh, Naiwieng 26: Bun tylli ki Trok ki Trok ba kit jingkit kiba hap ban iaid lyngba ka Kiling Weighbridge (Khyrdop) kaba la buh da ka sorkar ha ka surok Killing ki la hap ban sangeh noh shipor khlem da iaid lyngba katei ka khydop, kaba dei hadien ba ki la ioh jingtip ba ki nongialam bad ki dkhot ka Hynriewtrep National Youth Front (HNYF) Northern Region, ki mut ban jurip ia ka rukom treikam hapoh katei ka khyrdop, kaba ki thmu ruh ban khynra kot khynra sla ha kano ka rukom ki pyntreikam ia ki trok bai aid lyngba katei ka khyrdop.
Ki nongialam bad dkhot ka HNYF mynta ka sngi ki la hiar ban jurip ia katei ka Weigh Bridge, bad hadien ba la poi ha katei ka khyrdop la lap ba la don lypa ki Pulit na Khanapara Police Station lem bad ki Pulit CRPF kiba la pahara ha katei ka khyrdop na ka bynta ban tem ban nym mih kano kano ka huri hura kaba ktah ia ki paidbah.
Haba kren halor kane ka phang ba ki la leit ban jurip, u Bah Hesting Lyngdoh, President bad u Bah Alfred Malai, General Secretary, ki la pynpaw ba ka daw kaba la pynlong ia ka seng ban leit jurip ia katei ka khyrdop khrong khajna ka sorkar, ka dei hadien ba ki la ioh jingtip ba ki Kali kit mar ba kythup ki Kali ba kit kit mawria, mawheh, shyiap bad khyndew bad kiwei kiwei ki mar na katei ka thain Killing ki leit ban shalan sha ka jylla Assam.
Ki la pynpaw ruh da kaba ong, ba ka seng ka sngewlyngngoh ban iohi ne lap, ba tang hadien ba ka seng ka la wan hiar ban jurip ia katei ka khydop, ki Kali ba kit mar ki la ioh jingtip lypa bad ym shym la iohi shuh wat kawei ruh ka trok kit mar kaba wan na katei ka khydop, katba ha kiwei ki sngi pat ki trok kit mar ba kit palat pud ki iaid sahuh na katei ka surok Killing.
Kitei ki nongialam ki la pynpaw ruh ba kim don kano kano ka jingbishni ne tuklar ia katei ka khydop ba la buh da ka sokar, hynrei ka seng ka sngewkhia ba bun kim don ki kot ki sla bad ka seng ka ieng halor ka nongrim ba ka jingmih ki marpoh khydew na katei ka jaka kam dei ban long ka jingduhnong ia ka sorkar Meghalaya bad ka dei ban ioh nong ia ka khajna ban kyntiew ia ka roi ka par ki paidbah ha ka jylla.
Shuh shuh, ki la bynrap ruh da kaba ong kumba ki la lap ba ka don ka jingsuba halor ka jingkit beain ia ki mar ki trok la sakhi ba ha ka jingwan jurip ym shym la don kano kano ka trok kit mar bad na ka liang ka seng kan dang iaid bundien bad kan nym ailad ba ka jingdon katei ka khydop kan long ka jingduhnong ia ka sorkar bad ka dei ban long ka jingiohnong ba dei ban iaid katkum kyndon bad ym ban shu leh da ki kam beain kiba ktah ia ki paidbah khatam ha katei ka thain la pynjot lut ia ki lum ki wah bad ki jingdon jingem hapoh ka mei mariang, ki la bynrap.
