Nongpoh, Naiweing 01: U Bah Sadon Blah kum u nongialam ba rangbah ka Hynniewtrep National Youth Front (HNYF) ha ka sngi Saitjain u la hiar sha ka thain Ri Bhoi Sepngi ha ka shnong Jirang na ka bynta ban pynskhem ia ki nongialam jong ki ar tylli ki Circle kata ka HNYF Umsong Circle bad ka Umrit Circle, ha kaba kine ki 2 tylli ki Circle kin ia trei lang bad ka HNYF Patharkhmah Circle ban pynmih pat ia ka HNYF Western Zone.
Ha kane ka jingpynskhem ia kine ki nongialam ba thymmai kitei ki ar tylli ki Circle, nalor u President ba rangbah ka HNYF u Bah Sadon Blah, kiwei kiwei kiba la ia don lang ki kynthup ia u Bah Hesting Lyngdoh President ka HNYF Northern Region u Bah Barnabas Manih, Vice President ka HNYF Northern Region, u Bah Robin Umbah, Finance Secretary ha ryngkat ka jingiadon lang ki nongialam na Patharkhmah Circle bad kine ki nongialam bad ki dkhot ba thymmai kitei ki 2 tylli ki Circle.
Haba kren ha kane ka sngi, u Bah Sadon Blah kum u President ba rangbah ka seng u la kren halor ka jingshah thombor ka jaid bynriew kaba la dei naduh ka por ka jingsynshar ki dohlieh bad ka dang iaid bteng haduh kine ki sngi ba la synshar da ki dohiong, ha kaba ia ka ia ka ia ka jaid bynriew jongngi la pynlong jubor kum kita ki nongshong shnong ka ri India.
U la ong ruh haba pynlong jubor ia ka jaid bynriew jongngi ha ka jingsynshar ka ri India, ka dei kaba la shu thom bor ba ki Khasi ki dei ki jaid bynriew ba ioh ia ka jingsynshar laitluid da ki Syiem bad ban pynlong jubor hapoh ka thup ka ri India la shu leh thok bad leh jubor.
Une u nong ialam rangbah ka HNYF, u la pynsngew ruh ba ka sorkar pdeng bad ka jylla ki la shu pynbun da ki Ain bad ki act haduh ba ki jaidbynriew Khasi kam ioh shuh ia ka jinglaitluid bad ruh la shu leh jubor ne thom da ka bor tang ban ioh pyndonkam iaka marpoh khyndew kaba long kum ka lad kamai ja kpoh, ha kaba la shuh pynlong beaiñ lut naduh u dewiong, ki maw ka shyiap bad ia u Uranium pat la pynbam pisa lut ia baroh tang ban ioh ban tih ia u, u ba lah ban pynduh jait iaka jaitbynriew Khasi jongngi.
Shuh shuh, ha kane ka sngi, u la ai ruh ka nuksa ia ka jingiakhih ki samla ha NEHU ban weng ia u Vice Chancellor, kaba ha ka jaka ba un sngap ia ki mat jingdawa ki samla pule, pynban u pan shipai na ka sokar ban iada ia u, kane baroh ka dei ka jingshah thombor ia ka jaid bynriew bad kum u nongialam u la kynti ia ki samla ba ki dei ban shim ia ka jingkitkhlieh ban iada ia ka khyndew ka syiap, namar ngi im, ngi iap bad ngi duk ngi riew sphah ngin kut tang ha kane ka jaka, hynrei lada u mynder ne u bar jylla u wan ban kamai na kane ka jylla bad rah ia ka spah sha la ka shnong lajong, u la bynrap.
