Nongstoin, Nohprah 03: Kum u Myntri rangbah ka jylla, u Conrad K. sangma mynta ka sngi u la hiar sha Nongstoin na ka bynta ban ia kren ne ia tai halor shibun ki phang kiba ia dei shaphang ka jingmyntoi ki paidbah lyngba ki lad jingiarap ka sorkar ba la tip kum ka ‘CM-Connect Outreach’.
Kane ka prokram kyrpang ba la pynlong la tip kum ka Block Level Interactive Program ba la shim bynta da ki shnong bapher bapher ba hap hapo ka Nongstoin Block, ha kaba l shim bynta ruh da ki heh ophisar, ki nongmihkhmat na ki tnad sorkar bapher bapher bd ruh ki nongialam na ki shnong bapher bapher.
Na ka liang ki nongialam shnong bapher bapher ha kane ka sngi ki la wan rah shibun ki jingiakren kiba ki paidbah ki donkam bad ruh ba ki donkam ia ka jingshim khia jong u myntri rangbah. Ki katto katne ki phang ba la pynpaw da ki nongialam shnong ki kynthup naduh ki surok, ki jingkieng, ki health centre, ki jingdonkam ban kyntiew ia ka kam jngohkai pyrthei, ban kyntiew ia ki kam ialehkai sport, ban kyntiew kyrdan ia ki skul bad kiwei kiwei kiba ki paidbah ki donkam ha katei ka thain.
Haba kren ha kane ka sngi ha kaba ia dei bad ki jingdonkam ban ka koit ka khiah, u Mynti rangbah ka jylla u Conrad K. sangma u la kren shai bad ka sorkar kan dang pynjanai bad pynpura ia ki jaka ai jingsumar kiba la don lypa bad ruh ban dang pynbit pynbiang ia kiba dang duna.
U la iathuh ruh ba ka sorkar kan ai jingiarap kyrpang da ki kynaj jingiarap ba kyrpang ia ki kynhun seng ba kin dang pynbit pynbiang iaki jaka ai jingsumar kiba la don lypa kumba la angnud da u paidbah.
Ha kane ka sngi u la kren ruh ba ka sorkar kan shim khia na ka bynta ban dang kyrtiew kyrdan sha ka kyrdan kaba kham bhai a ka Nongstoin Civil Hospital.
Haba kren halor ki lad ba kyntiew ia ki kam ialehkai sport, u Myntri rangbah u la iathuh ba ka sorkar jylla ka la pynmang kukmba 1000 klur bad kynthup ban tei ia ki jingdonkam bapher bapher kiba ia dei ba ki kam ialehkai sport.
Na ka bynta ki surok sha ki shnong nongkyndong, u myntri rangbah u la pyntop ba ki la don katto katne ki jingpynmang ia ki surok ba ka sorkar kan pynbha ne shna surok, kaba dei lyngba ka CM Rural Connect Program.
Shuh shuh, u myntri rangbah ula ong ruh ba lyngba ka CM connect ka dei ka lad ba ka sorkar kan sngap bad kan shim khia ia ki jingdonkam bapher bapher kiba don kita ki jingduna sha ki paidbah. u la pynshlur ruh ia ki MLA, ki heh ophisar ba kin don ka jingiatrei lang kaba jan bad ki paidbah khnang ban lah ban pynurlong kumba ki paidbah ki angngnud ban ioh ia ki jingmyntoi lyngba ki lad jingiarap na ka sorkar.
