Nongpoh, December 7: Ka LS Syiemlieh Production mynta ka sngi ka la pynlong ia ka Semi Final jong ka Ri Bhoi Super Star-Season-2 ha kaba haduh 30 ngut ki samla ki ia knieh ban rung sha ka thup jong ka Grand Finale kaba sa long ha Umsning ha u bnai January.
Ia kane ka jingpynlong ia kane ka Semi Final jong kane ka Ri Bhoi Super Star Season-2 la pynlong ha Pariash Hall, Nongpoh, ha kaba kitei ki samla kiba don sap ha ka jingshad bad jingrwai ki la shim bynta bad sei ruh ia ki sap ki phong na ka bynta ban shah jied ban rung sha ka thup jong ka Grand Finale jong kane ka Ri Bhoi Super Star-Season-2 ba la pynlong da ka LS Syiemlieh Production.
Ia kane ka prokram la pyniaid da ka Samla Banisha Umbah bad ki nongbishar ki ban bishar ia ki nongshad bad ki nongrwai ki kynthup ia u Samla Standwell Manih, ka Samla LB Driss Syiemlieh bad ka samla Jerica Kharkrang.
kumba la paw, ha ka jingbishar ki nongbishar, ka samla Deifilia Kharnaior, namar ka jingtbit jongka ban rwai kala pynum ia ka mynsiem ki nongbishar bad tang hadien ka jingrwai, ki nongbishar khlem pat da ai ia ki point ba ka ioh, ka la shah jied syndon ban rung sha ka thup jong ka Grand Finale ka Ri Bhoi Super Star-Season-2.
Kumba la pynpaw da u Bah Lansius Syiemlieh, CEO ka LS Syiemlieh Production, ka jingthmu ba la pynlong ia kane ka Ri Bhoi Super Star- Season-2, ka long ba sei madan ia ki khun samla kiba don sap ha ki jingrwai bad jingshad bad lyngba kane ka ryngsan ki lah ban pynpaw ia ka sap kypang ba la ai da u Blei ym tang ba ki paidbah kin iohi ia ki sap ki phong jongki, hynrei ba kane ka sap kaba ki don kan long ruh kum kawei na ka lad ai ai kam jam ia ki khun samla.
Shuh shuh, u la ong ruh ha kane ka juk kyrduh kam, bun ki khun samla ki donkam ban sei madan ia ki sap ki phong ba ki don bad lada ym don kum kane ka rynsan ka long kaba eh ba ka pyrthei kan tip ia kata ka sap ka phong jong ki khun samla. Namar kata, u ong ba ka LS Syiemlieh Production kan dang iai bteng ba pynlong kum kine ki rynsan ia ka kop bad u khmih lynti ruh lyngba kane ka rynsan kaba la pynlong da ka LS Syiemlieh Production kan long shisha ka lad ne ka kabu ia ki khun samla ka Ri Bhoi bad ka jylla hi baroh kawei ba kin ioh ia kata ka lad ban sei madan ia ki sap kyrpang ba la ai da u Blei.
