Nongpoh, 08 Nohprah: Ki nongialam ka seng Hynriewtrep National Youth Front (HNYF) Women’s Wing, hynnin ka sngi Saitjain, ki la leit ban ai sngewbha da Blanket sha ki 60 tylli ki longiing baduk kiba don ha ki shnong bapher bapher, kiba don ha ka thain Pynthor Sohma, Shnat Raid Tynring ha Ri Bhoi.
Ia katei ka kam ban sam jain kup syaid sha ki longiing baduk, la pynlong ha shnong Pynthor Sohma, ha kaba la sakhi da ka jingdon ka Kong Orianda Kharkongor, President ka HNYF Women’s Wing Sengkmie, ka Kong Phrinsibon Kharmuti, General Secretary lem bad kiwei.
Haba ki kren ha katei ka sngi, kitei ki nongialam ka HNYF Women’s Wing, ki la ong ba katei ka jingsam jain kup syaid sha kitei ki longiing baduk, ka long kum shibynta ban iadon bynta lang bad ki longiing baduk bad khamtam shwa ban rakhe ia ka Khrismas bad kumjuh ruh ban pdiang ia u snem ba thymmai.
Ki la kyntu ia kitei kiba la iohpdiang ia kitei ki Blanket, ba kin pdiang da kaba hun mynsiem, namar kum ka seng kam lah ban ai ia kata ka ban pynhun mynsiem, hynrei ka ai kat ha ka jong ka bor, kaba long ruh kum shibynta ban iadon bynta lang bad ki longiing baduk.
Lyngba jong katei ka sngi, ba kitei ki HNYF Women’s Wing, ki la ai sngewbha da ki jain kup syaid, ki la pynlong ruh ia ka jingiabam khana hapdeng ki nongialam ka seng lem bad kiwei ki nongioh pdiang ia kitei ki jain kup syaid.
