Jowai, K’lyngkot 10: U Myntri rangbah ka jylla Meghalaya, u Conrad K. Sangma mynta ka sngi kum u kongsan u la leit ban plie paidbah ia ka jingrakhe dap shispah snem ka shnong Chutwakhu ba hap haka West Jaintia Hills District bad kane ka jingrakhe ka la long kaba phuh ba phieng lyngba ki prokram bapher bapher.
Ha kane ka jingplie ia ka jingrakhe ia ka Centenary Jubilee ka Shnong Chutwakhu la shim bynta lang ruh da ka jingdon lang u Symbut Myntri ka jylla u Ma Sniawbhalang Dhar, u MLA ka Jowai u Bah Wailadmiki Shylla, u Bah Lakmen Rymbui MLA ka Amlarem bad kiwei kiwei.
Haba ai ka jingkyrkhu kyrdoh ia ka shnong Chutwakhu kaba la iaid lynti haduh shispah snem naduh ba la seng ia katei ka shnong, u Myntri rangbah ka jylla u Conrad K. Sangma u la ai khublei kyrpang ia ka Dorbar Shnong kaba la poi sha u mawmer ba 100 snem ka jingiaid lynti jong ka shnong bad kane ka jingrakhe lehkmen ka long shi bynta ba kane ka shnong kan dang kiew shaphrang ha ka bha ka miat bad ka roi ka par jong ki paidbah nongshong shnong.
Kum u myntri rangbah, u Conrad K. Sangma u la ban khia ruh halor ka jingmyntoi kaba ngi ioh lyngba ka jingdon jong ka imlang ka sahlang bad ka jingkhlain jong ka jylla Meghalaya ka shong ruh ha ka jingiatylli jong ki shnong ki thaw bad u kyrpad ruh ia ki shnong ba kin ai ia ka jingiatrei lang na ka bynta ka jingkiew shaphrang ki paidbah ha ki District bad ka jylla lyngba ka jingiatrei lang jong ki Dorbar Shnong bapher bapher hapoh ka jylla.
Lyngba jong kane ka sngi, na ka liang u Myntri rangbah u la pynkhamti ruh ia ka song pisa kaba T. 21 lak sha ki 21 tylli ki Sport Club bad ki Association ka West Jaintia Hills kaba long ka jingpynkhreh na ka bynta ka Meghalaya Games.
