Shillong, K’lyngkot 11: Ka Shillong Lajong Football Club, ka la kiew sha ka kyrdan ba 7 ha ka miej iakhein poin jong ka I-League bad kata ka dei hadien ba ka la lah ban pynliem ia ka Real Kashmir ha ka jingiakhun kaba la long hynnin ka janmiet ha madan SSA Stadium ha Nongbah Shillong.
Kumba ka long mynta, ka Shillong Lajong kaba don ha ka kyrdan ba 7, ka don 9 poin ha kti na ki 7 sien iakhun ha ka I-League bad ka Inter Kashi ka don ha ka kyrdan kaba hakhlieh duh bad kaba don 14 poin na ki 7 sien iakhun.
Ha ka jingiakhun kaba hynnin ka sngi, ka Shillong Lajong, ka la lah ban pynliem noh ia ka Real Kashmir da 1-0 bad ia katei ka kol, la thep da u Aman Ahlawat ha ka minit ba 34 jong ka kylla step.
Ka jingiakhun hapdeng ka Shillong Lajong bad Real Kashmir, ka dei kaba jingiakhun kaba iakhaid eh bad khamtam eh ba na ka Shillong Lajong, la bun ba mihkhmat da ki rangialehkai kiba dei ki samla Khasi.
Lyngba katei ka namjop, ka Shillong Lajong kan sa iakhun pyrshah sa ia ka Sporting Club Bengaluru, ka kynhun kaba don ha trai duh jong ka miej iakhein poin, ha kaba ka jingiakhun kan sa long ha ka 13 tarik mynta u Bnai ha ka por 4:30 baje janmiet ha SSA Stadium, Nongbah Shillong.
