Ka Seng Federation of Khasi Jaintia & Garo People (FKJGP) North Khasi Hills District, lyngba u Bah Shanlang Diengdoh, General Secretary ka Seng, u la pyntip sha ki lad pathaikhubor, da kaba ong ba ka FKJGP NKHD, ka kyntu ia ka sorkar ba ka dei ban pynkloi noh ha ka ban pynurlong ia kaba ka la kular bad kata ka dei ia ka Mawhati C&RD Block bad kumjuh ruh ia ka surok ba T. 130 klur na Sonidan sha Umsiang bad ka ban mih shaduh Topatoli, Assam.
Kum ka seng, haba ngi la iohi lyngba ki lad pathaikhubor ia ki jingkular jong u Bah Prestone Tynsong, Symbud Myntri Rangbah, uba la kren ha ka jingialang paidbah kaba dang shu long shen ha Nongjri, ha kaba u la kular ban pynurlong ia Mawhati C&RD Block bad kumjuh ruh ia ka surok ba T. 130 klur na Sonidan sha Umsiang, ka seng ka sngewkmen eh, namar ba ka dei ka jingmyntoi na bynta u paidbah ha ka Mawhati Constituency hi baroh kawei.
Shuh shuh, utei u nongialam ka FKJGP, u la ong ba Mawhati C&RD Block kumjuh ruh ka suroh na Sonidan sha Umsiang, ki dei ki mat ba ka seng ka la shim bad pynsngew sha ka sorkar, da kaba kdew ba ki dei ki jingdonkam kiba hakhmat eh jong ki paidbah ha katei ka thain hi baroh kawei.
Kumta haba ngi iohi ba u Bah Prestone Tynsong, u la kular ban pynurlong ia kitei ki jingdonkam ki paidbah, na ka liang ka seng ka sngewdei ban kyntu ia ka sorkar jylla, ba ka dei ban pynkloi noh, khnang ba kan da long shisha kaba ai jingmyntoi ia ki paidbah, kiba la mad ia ka jingsniew surok na Sonidan sha Umsiang bad kumjuh ruh halor ka Mawhati C&RD Block, ba ki paidbah bad khamtam ki nongialam shnong, ki la shem jingeh ban beh ia ki kam ki jam shaduh Umsning Block, la bynrap utei u nongialam ka FKJGP.
