Nongoh, K’lyngkot 12: Ka lympung ialehkai phutbol kaba la pynlong da ka KSU Umsning Circle, kan sdang lashai ka 13 tarik mynta u Bnai ha Madan ialehkai ka Umsning Patarim bad haba sdang katei ka lympung ialehkai, ka jingiakhun kan long hapdeng ki artylli ki kynhun ialehkai ba radbah hapoh ka jylla, kata hapdeng ka Nangkiew Irat pyrshah ia ka Mawlai Impact, ki ban sa iakhun ha ka por 1 baje nohphai sngi.
Katei ka lympung ialehkai kaba la pynlong da ka KSU Umsning Circle, ka dei kaba la tip kum ka Maishaphrang Cup Open To All Football Tournament, ha kaba ka nongrim jong ka KSU ban pynlong ia katei ka lympung ialehkai, kan long ruh kum shibynta ban pynsaphriang paidbah ia ka khubor ban pyrshah ia u Drok, u jingdih uba la pynjot ia kiba bun ngut ki khun samla.
Haba phai halor ki khusnam, ka KSU ka la buh ia ka song pisa kaba T. 5 lak na bynta ka kynhun nongjop bad T. 3 Lak na bynta kaba shah rem ha ka phainal, nalorkata kin sa don ruh sa kiwei de ki khusnam shimet.
Ki don kumba 16 tylli ki kynhun ialehkai na kylleng ki jaka na ka jylla bad na shabar jylla ruh kumjuh, ki la wan ban iashimbynta katei ka lympung ialehkai.
Ka KSU Umsning Circle, lyngba u Sports Secretary u Samla Bines Kylla, u la kyntu ia ki paidbah, naduh ki longkmie longkpa lem bad ki khun samla, ba kin leit ban sakhi sha katei ka lympung ialehkai ba la pynlong da ka KSU Umsning Circle.
