Nongpoh, K’lyngkot 12: U wei u rangbah briew u la mynsaw jur hadien ba u la shah lymbub bad shah rong ha kawei ka kali ka bym lah ban ithuh kaba la rong ia u ne u rangbah naduh ka jaka ba shah tynrah na Umran Diary shaduh kawei ka jaka kaba don ha ka thaiñ Nongthymmai ha ka lynti shnong Sohbhala, ha Ri Bhoi District.
Katkum ka khubor ba la iohlum na ki pulit ka Umsning Police Station, la iathuh, ba u wei u rangbah briew ba la tip kyrteng kum u Balaram Podder (56) snem na ka shnong Sahapur, West Bengal, u ba la wankai bad ki paralok sha kane ka jylla Meghalaya, hadien ba poi ha kawei ka jaka ha Umran Diary, ka bus kaba ki shong ka la ieng ban ia shet jingshet hynrei katba u ne u rangbah u dang thmu ban jam sha kawei ka liang u surok bah National Highway 06 ban leit thied jingthied u la shah tynrah ha kawei ka kali ka bym lah ban ithuh ne iohbat ia u number, kane ka jingjia ka la jia hynnin ka miet ha ka por 7 baje ne 7 shiteng eiei.
La iathuh ruh, ba ha kane ka jingjia, ba u tei u rangbah hadien ba u la shah tynrah ha katei ka kali u la sahkut halor jong kane ka kali bad kiba niah ia katei ka kali kim shem la ieng satia bad rong beit ia u shaduh kawei ka jaka kaba don hajan ka shnong Sohbhala, Nongthymmai Umsning bad ki la bret noh ia u tei u rangbah hapdeng ka jingmynsaw bad ban phet krad noh na katei ka jaka, hadien ka jingioh jingtip jong ki pulit halor katei ka jingjia kiba la pyrshang ban phone ia u ban tip ia ka jaka kaba u don hynrei dei tad hadien ba la lap da ki katto katne ngut ki nongshong shnong ba la pyntip ia ki pulit ba ki la lap ia u wei u briew hapdeng ka jingmynsaw, bad la rah noh ia u ban shah sumar ha Umsning CHC hadien la pynkynriah noh sha Shillong Civil Hospital.
Na ka liang ki pulit, ka Umsning Police Station, ha ka jingtohkit bad thwet ia katei ka kali kaba la tynrah bad rong ia u tei u rangbah bad ban bret ia u hapdeng ka jingmynsaw, ki la pynlong ia ka jingtalasi ha ka thaiñ Umsning hynrei namar ka jingdum jong ka miet ym shem la ioh satia ban lapksai ia katei ka kali, na ka liang ki bahaiing jong u tei u rangbah ki la rai ban ialam noh ia u sha West Bengal ban phah sumar ia u ha katei ka jylla, ki pulit ki dang pynlong ia ka jingtohkit ban lap ia katei ka kali.
