Shillong, Kyllalyngkot 12: U Myntri Rangbah ka jylla u Conrad K Sangma u la pyni ia ka nuksa kaba bha ban burom ia ki para mynsiem kiba don hapdeng ki jingdonkam jingiarap, bad kane ka la jia hadien ba u Myntri Rangbah lem bad ka Kong Ampareen Lyngdoh ka Myntri ka tnad ka Koit ka Khiah ki la hiar hi dalade ban ai jingiarap ia ki 2 ngut ki briew kiba la mynsaw na ka jingjia kylla kali ha Mawkdok, East Khasi Hills District.
Kane ka jingjia aksiden kali, kaba la jia ha Mawkdok ka la jia ha ki por mynstep katba u Myntri Rangbah ka jylla lem bad ka Myntri ka Tnad Ka Koit ka Khiah kiba dang wanphai na Sohra na ka jingiashimbynta ha ka jingialang ba kyrpang kaba la neh 2 sngi, hamar ba poi ha katei ka jaka la iohi ia ka jingkylla kawei ka kali ba la shong da ki 2 ngut ki nongwan jngohkai pyrthei kiba la mynsaw marmar u Myntri Rangbah, ka Kong Ampareen Lyngdoh bad ki pulit ki la ieng ban ai jingiarap ia kitei kiba la mynsaw.
Na ka liang u Conrad K Sangma, u la bthah ruh ia u doctor ba donlang ha ka kynhun jong u ban jurip ia kitei kiba la mynsaw bad ruh ban phah wan ia ka kali kit nongpang ban ialam phah sumar ia kitei kiba la mynsaw sha nongbah Shillong.
