Nongpoh, K’lyngkot 13: Ka kynhun ki Longkmie na ka thain Tyrso ha Ri Bhoi District, mynta ka sngi ki la tur sha ka ophis u Deputy Commissioner ka Ri Bhoi halor ka jingthmu ban wad jingtip na katei ka ophis treikam, kaba dei halor ka jingbym ioh ia ka Ration Card la bun bun snem mynta.
Ha kane ka jingleit sha ka ophis u Deputy Commissioner la ialam da ka Kong Iohilut Lyngdoh lem bad kiwei kiwei ki Longkmie bad ka jingthmu jongki, ka long ban wad ia ka jingtip kaba bniah, kaba dei halor kata ka nongrim ba da ki spah ngut ki Longing baduk ha katei ka thain kim shym la ioh Ration Card haduh kine ki sngi, kata naduh ka Census 2011, ba ka kyrteng jongki, wat lada ki dei ki longing baduk kam shym la rung ha kata ka thup ban ioh ia u khaw ration kaba la mang da ka sorkar kmie.
Haba ia kren bad ki Nongthoh Khubor, Ka Kong Iohilut Lyngdoh lem bad kiwei ki Longkmie, ki la pynpaw ba ka jingwan jongki sha ka ophis u Deputy Commissioner kam dei satia ban wan rah jingklumar, hynrei ka dei kaba ki kwah ban dawa ia ka hok ba kum kita ki longing baduk ki dei ban ioh ia u khaw ration ba la mang da ka sorkar kmie ia kita ki Longing baduk.
Na ka liang u Deputy Commissioner ka Ri Bhoi, u Abhilash Baranwal, u la kubur ba ki Longkmie ki la wan ia kynduh ia u, ban dawa ia kata ka Ration Card, hynrei kum u khliehduh ka District u la pynshai sha ki, ba ka ophis jong u, kan nym lah ban leh ei ei lada ym pat don kata ka jingmang thymmai na ka sorkar kmie. Wat la katta ruh u la kular ba un sa shim khia ia kane ka jingangnud ki Longkmie sha ki bor ba dei peit ha kaba kito ki longing baduk kiba dei ban ioh ia ka ration card ki dei ban ioh pdiang kumba la mang da ka sorkar kmie kaba ki hap ban iaid katkum ki kyndon treikam ba la mang da ka sorkar kmie.
