Nongpoh, K’lyngkot 13: Ka Dorbar Shnong Umshangling mynta ka sngi ka la leit syndon ban kynduh ia u Deputy Commissioner ka Ri Bhoi ban ai syndon da ka jingthoh halor ka jingwan tep khlem akor ia ka met iap ha katei ka shnong, kaba la ktah ia ki paidbah nonghsong shnong bad khamtam ia ka koit ka khiah ki paidbah.
Ki nongialam shnong ha ka jingialam u Rangbah Shnong u bah James Maiong bad u Secretary Shnong u Bah Vincent Sohkhwai lem bad ki rangbah bad ki Longkmie mynta ka sngi ym tang ba ki la ia kynduh ia u Deputy Commissioner bad ki la ai ruh ka jingthoh ban ujor halor ka jingwan tep khlem akor ia ka met iap ha katei ka shnong kaba la shu leh khlem akor, ha kaba kane ka jingjia ka la jia hynnin ka sngi ba la wan tep ia kawei ka met iap ha katei ka shnong.
Kumba la pynpaw da u Secretary Shnong u Bah Vincent Sohkhwai, u la ong ba lada ka long ha kane ka rukom ka shnong kan khang ban wan tep ia ki met iap ha katei ka shnong, lada ka ophis u Deputy Commissioner kam shim khia bad la buh ruh ka jingdawa ba dei ban pyntip sha ka shnong, ban thung briew ban ap ha katei ka jaka tep met iap bad ruh ban pyntip sha ka shnong lada don ka jingwan tep ia ki met iap bad lada ym lah ban shim khia ka shnong kan khang syndon ban wan tep ia ka met iap.
Na ka liang u Deputy Commissioner ruh, haba kren halor kane ka phang, u la iathuh ba un sa shim khia ban ia kren bad ka tnad Pulit, ka Nongpoh Town Committee bad ruh ka bor synshar District, ha kaba u la kular ban shim khia ba kum kane ka jingjia kan nym jia shuh bad kane ka ktah shisha ia ka koit ka khiah ki paidbah ha kaba ia ka met iap la rah da u ksew kaba long ka jingma ia ka koit ka khiah ki paidbah.
