Nongpoh, Kyllalyngkot 13: Ban ialeh kmen shisien shisnem lem bad ki para nongrep hadien ka aiom ot, ka kynhun ka Ri Lajong Farmer’s Produce Organization ka la ioh ban pynlong da ka Harvest Festival 2025 ban lum ban lang ia ki para nongrep ban ai mynsiem bad jingkitbok kitrwiang ba kin nang roi nang par bad nang man bha ka rep ka riang jong ki baroh shisnem.
Ia kane ka program iakynduh lang jong ki nongrep ba la pynlong da ka Ri Lajong Farmer’s Produce Organization, la pynlong ha ka shnong Mawphrew kaba dei ruh ka model fruit village lane ka shnong kaba pynmih bunjait ki soh ki pai ha ka them Ri Bhoi District.
La wan ban ia shimbynta ha kane ka program ban ai mynsiem ia ki nongrep, da u Bah Mardondor Tongper, Additional Deputy Commissioner ka district kum u kongsan ha ka jingiadonlang ruh u Dr. K Govindasamy, Director ka ATTARI ICAR, u Dean ka CAU college u Dr. Ram Singh, u Dr. Sanjay Swami na CPGSAS, Umiam, u Bisham Singha na ka GIAMF, ka ki nongialam ka Ri Lajong Farmer’s Produce Organization ba kynthup ia ka Kong Marian Maring, President, u Bah Parlad Toor, Vice President nalor kiwei kiwei ki nongkitkam jong ki Unit bapher bapher.
Haba kren ha kane ka program, ki nongkren ki la ai khublei snem thymmai ia baroh ki nongiashimbynta, da kaba ai jingiaroh ruh ia ka kynhun ba la lamkhmat jong ki nongrep kane ka district Ri Bhoi, ban lum ban lang ia baroh kum ka jinglehkmen lang hadien ka aiom ot kaba dei ruh ka jinglehkmen halor ka jingseisoh ka jingtreishitom ka jong ki kum ki nongrep baroh shisnem.
“Kane ka ri ka dei ka ri kaba burom bad kheiñ kongsan bha ia ki nongrep namar khlem ki nongrep, ym kin ba ki paidbah kin im shah thngan, kumta ia kum kane ka program lehkmen jong ki nongrep lane ka Harvest Festival la ju pynlong ha man ki jylla jong ka ri India kum ka dak ban leh kmen namar ka jingkheit ia u soh jong ka jingtreishitom”, ong ki nongkren.
Ki la ai ruh, ia ki kyntien kyrkhu kyrdoh ban kitbok kitrwiang ia baroh ki nongrep kiba long kiba kyrpang ba kin nang ioh ban pynmih ia ki mar rep bapher bapher jong ki kiba seisoh na kawei ka snem sha kawei pat ha ryngkat ka Koit ka Khiah bad ka roi ka par ha baroh ki liang.
