Nongpoh, K’lyngkot 15: Ban bteng ia ka jingshakri ia ki paidbah ka thain Ri Bhoi, ka Ri Bhoi Youth Federation (RBYF), Sengkmie mynta ka sngi ka la pynthymmai biang ia ki nongialam ba pura bad u Bah Bipul Thangkhiew u la wan biang kum u President ba rangbah ka RBYF nalor kiwei kiwei ki nongialam.
Ia kine ki nongialam ba thymmai ka RBYF la pynskhem mynta ka sngi da u President barim ka RBYF u Bah B.B Makdoh, ha ka jingiadonlang u Bah EK Lapang, nongialam barim ka RBYF, ha ka jingialang kaba la long mynta ka sngi ha ka ophis treikam ka RBYF ha Saiden, Nongpoh.
Kitei ki nongialam ba thymmai ka RBYF na ka bynta ka samoi treikam jong u snem 2025-2028 ki kynthup ia u Bah Bipul Thangkhiew kum u President, Liander Nongshli Working President, Vice President, Bullet Marbaniang, General Secretary, Kynsai Nengnong, Denis Syngkli, Assistant Secretary, P.P Kylla Chief Organizing Secretary, Balawan Marwein Finance Secretary, R.J Thangkhiew Political Secretary, Wanpher Wahlang Publicity Secretary, S. Marbah Education and Environment Secretary, Never Makdoh Sport Secretary lem bad kiwei.
Haba kren ha kane ka sngi kum u President ba rangbah ka RBYF, u Bah Bipul Thangkhiew, u la pynpaw ia ka mynsiem jong ka jingkmen ba ki nongialam ki la ibit biang ia u ban shim ia kane ka lyngkor kum u president ba rangbah ka seng bad kum u president ka seng u la kular ban ai ka jingiatrei lang na ka bynta ban shakri kyrpang ia ka Ri Bhoi District khamtam ka RBYF ka dei ka seng trai na Ri Bhoi Distsrict.
Na ka liang u Bah B.B Makdoh, President barim bad ruh u Bah E.K Lapang, nongialam barim ka RBYF ki la ai khublei kyrpang ia kine ki nongialam ba thymmai ka RBYF bad ki ai ruh ia kata ka jingkitbok kitrwiang ba kin shim shisha ia kata ka lyngkor nongialam na ka bynta ban kit khlieh ia ka eh ka shon ki paidbah ha Ri Bhoi bad ruh ba long kita ki nongpynbha bad kiba kyntiew ia ka roi ka par jong ki paidbah ka Ri Bhoi District hi baroh kawei.
