Nongpoh, K’lyngkot 15: Ki nongialam jong ka All India Garo Union(AIGU) ki ba kynthup ia President u Albert Marak, u General Secretary u Diplu Momin bad ki wei kiwei ki nongialam ba ha khmat mynta ka sngi ki la hiar sha Byrnihat ban pynskhem iaki nongialam bad ka Unit ba thymmai kaba ki la ai kyrteng da ka All India Garo Union Regional Unit Byrnihat kaba la pynlong madan ialehkai phutbo ka shnong Dehal Bagan, Byrnihat.
Kine ki nongialam ka Regional unit Ribhoi District ki kynthup ia u Sunmoon Marak kum u Adviser, President u Simion Marak, u General secretery u Karan Marak ha ryngkat ki wei ki nongKitkam ba hakhmat bad ki dkhot ba la pynkupbor bad pynskhem da u President rangbah u Albert Marak ha ryngkat da ka jingduwai khnang ba kine ki nongkitkam ba thymmai kin lah ban wanrah iaka jingieid hapdeng ka jaitbynriew Garo.
Hakane ka sngi la wan ruh ban ia shim bynta lang da ki nongialam ka All Assam Garo Union, ka Garo student Union, ka All Khasi Hills Achick Federation, ki rangbah shnong, ki long kmie bad ki samla Garo na ka thain Byrnihat.
Haba ai jingkren ha kane ka sngi, u Albert Marak kum u President ka All India Garo Union, u la ong ba jingthmu kane ka jingialang ban pynskhem iaki ne ki nongialam jong ka Regional unit ha Ri Bhoi ka long shi bynta ban wanrah iaka jingiatylli hapdeng ki jaid bynriew Garo kiba don ha ka thain Ri Bhoi.
Kum u nongialam ba rangbah, Albert Marak, u la kyntu ruh ia kine ki nongialam ka All India Garo Union jong ka Ri Bhoi Regional Unit, ba kin shim ia kata ka lyngkor kum kita ki nongialam ban peit ban khmih ia ka bha ka miat ki paid Garo bad ha kajuh ka por ba kin long kita ki nongialam kiba trei na ka bytna ka bha ka miat bad ka roi ka par jong ka imlang ka sahlang.
