Khliehriat, Kyllalyngkot 16: Ha kawei ka jingjia hap ka Tata Sumo sha riat, ar ngut ki nongleit nongwan ki la khlad noh hashen, bad ar ngut kiwei ki la mynsaw jur, hadien ba ka sumo kaba ki shong ka la hap sha kawei ka riat kaba jylliew kaba don harud u surok bah National Highway 06, hajan ka Ratacherra Police Check Post, East Jaintia Hills District.
Katkum ka jingtip ba la iohlum, la iathuh, ba kane ka jingjia ka la jia hynnin ka sngi, ha kaba ar ngut kiba la khlad ki kynthup ia u nongniah jong kane ka Sumo bad kawei ka longkmie bad ar ngut ki longkmie ki la mynsaw jur katba ki dang thmu ban leit sha Silchar na Guwahati.
La ong ruh, mar ia ioh jingtip halor katei ka jingjia, ki bor shipai ka BSF napoh ka 172 Bn ki la leit ban hiar ban ai jingiarap ba marmar ia kitei kiba mad ha kane ka apot bad ban hiar shapoh katei ka riat ban sei ia kiba mynsaw ban pynkit sha ka jaka sumar kaba marjan hynrei la pynkynriah noh sha Silchar Civil Hospital namar ki jingmynsaw kiba la kham jur.
