Shillong, Kyllalyngkot 16: Ka long ka jingkmen kaba khraw bad ka jingsarong ia ki paidbah ka ri lum Jaintia, ha kaba ha ka 15 tarik u Kyllalyngkot, na ka liang ka sorkar jylla ka la rai ban kynthup lang noh sa ia ka ktien Pnar hapoh ka jingrwai ieid jylla ne ka Meghalaya State Anthem.
Ia kane ka la pyntip, da u Myntri Rangbah ka Jylla Meghalaya u Conrad K Sangma, ha ka jingiakren bad ki Nongthoh Khubor hadien ka jingialang ki Myntri, ha kaba u la iathuh, ba ki bor ka sorkar jylla hadien ba la ia mir jingmut bha khamtam bad ki nongmihkhmat napoh Jaintia Hills kynthup u Symbut Myntri Rangbah ka jylla u Sniawbhalang Dhar, ban pynkylla ia ka jingrwai ieid jylla da kaba yn kynthup lang ia ka Ktien Pnar ha ki katto katne ki bynta jong ka jingrwai (Lyric)
U la iathuh ruh, ba ia kane ka State Anthem ne ka jingrwai ieid jylla kaba thymmai yn sa pynlait paidbah noh ha ka jingplie pyrda ia ka 6th Meghalaya Games 2025 kaban long ha Wahejer, West Jaintia Hills.
