GUWAHATI, Jylliew 6:
Ki pulit ka jylla Assam kiba la shimkhia ban pynduh jait ia ka jingsaphriang jong u drok mynta ka sngi ki la ioh ban kurup ia u drok uba shong kumba T. 16 klur tam na ki ar tylli jingpynapshrip ha kaba la ioh ruh ban kem ia san ngut ki briew kiba donkti halor kane ka kam beain na ki ar tylli ki jaka mynta ka sngi.
Kawei na kine ki jingiohkem kadei ha ka jingpynapshrip kaba la pynlong da ki pulit jong ka thanad Cachar ha Dholaikhal ha kaba la ioh ban kem ia lai ngut ki briew kiba donkti bad ioh ruh ban kurup haduh 139 tylli ki synduk sabon kiba la thep ia u drok.
Na ka jingthew jong ki pulit, utei u drok uba don ha ki 139 tylli ki synduk sabon, udon kumba 1.700 kilo bad ha ka jingkhmih bniah, la ioh jingtip ba udei u drok Heroin, uba la shongdor kumba T.8.5 klur ha ka dor iew.
Sa kawei pat ka jingiohkem drok kadei hadien ba ki pulit ka Karbi Anglong ha ka jingpynapshrip, ki la ioh ban kurup haduh 40 hajar tylli u Yaba Tablets uba shongdor T. 8 klur bad kem ia ar ngut ki briew kiba donkti ban shalan beain ia kine ki jingdih kiba la khang pyrshah.
Na ka liang jong u Myntri Rangbah ka Assam, u Himanta Biswa Sarma haba kren ha ka sla X (Twitter), u la ai ka jingiaroh ia ki pulit ka Assam kiba la shimkhia ban pynduh jait ia u drok hapoh ka jylla.
