Manipur, Jylliew 07: Kawei ka district kaba la tip kum ka Jiribam hapoh ka jylla Meghalaya ka la sdang khihwin biang bad sdang pur ka jingiakynad hadien ka jingshah pyniap klet u wei u rangbah briew ba dei na ka jaidbynriew Meitei u ba la tip kyrteng kum u Soibam Saratkumar Singh (59) u ba sah ha ka shnong Sorok Atingbi Khunou hapoh ka Jiribam District, Manipur.
Kumba la ioh jingtip, u wei u rangbah briew na ka jaidbynriew Meitei, u Soibam Saratkumar Singh, u la shah kitnap ha ki riew kieng atiar ba shyrkhei katba u dang wanphai na ka jaka rep jong u kaba don ha ka shnong Leishabithong marjan bad ka shnong Khasia Punjee. Mar ia ioh jingtip ki bor pulit ka Jiribam District ki la pynlong ia ka jingthwet kaba jur ban lap ia kitei ki runar bym lah ban ithuh kiba la kitnap ia u Soibam.
Ki pulit ki la pyntip ruh, ba ha kane ka jingthwet kaba jur, ki pulit ki la lap pynban ia ka metiap jong u Soibam Singh na kawei ka jaka lum kaba don ha Mulargoan, ki pulit ki la rejister murder case halor kane ka jingshah pyniap jong u tei u rangbah.
Mar ia bna halor kane ka jingshah pyniap jong u Soibam Suratkumar Singh, ki paidbah kiba na jaidbyntiew Meitei hapoh ka district Jiribam, ki la khie bitar lep bad mih sha surok ban dawa ia ka jingtohkit kaba jur na ki bor pulit bad ban kem ia kiba donkti ban pyniap ia u ne u rangbah u dei na ka jaidbynriew Meitei kaba la wanrah ruh ia ka jingthut ha ka shongsuk shongshngain ha kane ka district hapoh Manipur.
Na ka liang u District Magistrate ka Jiribam u Krishna Kumar (IAS), u la bthah ia baroh ki ophisar jong kane ka district ha ryngkat ka jingiatreilang ki bor pulit ban peitngor bha bad ban shimkhia bha ban tehlakam ia kino kino ki jingjia kiba sngewsih kiba lah ban ktah ia ka shongsuk shongshngain jong ki paidbah ha kane ka district hi baroh kawei.
Ha kajuh ka por ban tehlakam ia ki jingjia ba sngewsih, na ka liang u District Magistrate ka Jiribam u la pynjari syndon da ka kyndon ain 144 CrPC, 1973 ha baroh kawei ka district, kaban pyrkhing ia ka leit ka wan bad ka jingmih ki paidbah na la iing hapoh u pud u sam ka district, hynrei la pynlait pat ia ka jingpyrkhing na kane ka kyndon ain tang ia ki nongtrei sorkar ha kane ka district, ki bor pulit bad ki tnat ba treikam bad ki bor pyniaid district ka Jiribam.
Lah ban kdew ruh, ba namar ka jingbym shongsuk shongshngain ha kane ka thain khamtam hapoh ki khappud jong ka Tamenglong bad Jiribam, na ka liang u District Magistrate ka Tamenglong ruh u la pynjari ia ka kyndon ain 144 CrPC, 1973 kaban pyrkhing ia ka leit ka wan ki nongshong shnong palat u pud u sam jong kine ki ar tylli ki district tad haduh ban da pynbna pat da kumwei, ong ka tyllong khubor.
BA SHAH PYNIAP KLEP U RANGBAH BRIEW MEITEI/ KTAH KA SHONGSUK HA KI DISTRICT HA MANIPUR/ PYNJARI 144 CrPC KI DM
