Nongpoh, Kyllalyngkot 27: Ka Federation of Khasi Jaintia and Garo People (FKJGP), Nongpoh Circle, mjynta ka sngi ka la leit ban ia kynduh ia ka District School Education Officer (DSEO) bad kaba dei ruh ka Joint Director of School Education and Literacy, Ri Bhoi District ban pynsngew halor ka jingeh ba la mih na ka jingbym ai ‘Transfer Certificate’ da ki skul bapher bapher. Kane ka Transfer certificate ka long ka kot kaba kongsan bha na bynta ki khynnah kiba kwah ban leit rung skul sha kiwei pat ki skul pule.
Ka kynhun FKJGP kaba la ialam da u General Secretary ka FKJGP Nongpoh Circle, u Bah Precious Khymdeit, ki la ai ruh ia ka dorkhas sha ka DSEO, ka Ruby Z. Das, ha kaba ki la dawa ban shim khia mardor ia ka jingbym ai Transfer Certificate da ki skul. Ha ka dorkhas, la pynpaw shai ia ki jingeh kiba ki khynnah, ba lada kim ioh ia ka Transfer Certificate kin nym ioh ban rung skul sha kiwei ki skul ba ki angnud ban leit pule.
Haba kren halor kane ka bynta, u Bah Precious Khymdeit u la ong ba ka DSEO, ka Ruby Z. Das, ka la ai ka jingkular ia ka FKJGP ba kan shimkhia ia kane ka kam bad kan pynmih ruh ia ka jingbthah sha baroh ki skul ha Ri Bhoi District ba dei ban ai ia ka Transfer Certificate sha ki khynnah kiba don jingthmu ban leit sha kiwei pat ki skul. Kane ka sienjam ka long ban pynthikna ba ki khynnah kin ym shah pynwit ha kaba iadei bad ki jingpule jong ki.
