Nongpoh, Kyllalyngkot 27: Ki Pulit Ri Bhoi hapoh ka jingbthah u Senior Superintendent of Police (SSP), ka Ri Bhoi District, ha ka sngi U Blei bad kaba dei ruh ka jingrakhe ia ka Republic Day ki la pynlong ia ka jingbat naphang ia ki Kali Ar Shaka bad kiwei ki Kali ba pynkheiñ aiñ, kaba la buh jingma shibun ym tang ia ki bad ruh ia ki paidbah kiba leit ba wan lyngba kane ka surkbah ha Ri Bhoi kaba dei na ka jingpynher sted ia ki Kali bad ka jingpynkheiñ ia ki kyndon aiñ ñiah kali.
Kane ka jingpyrkhing ki Pulit, ka dei khamtam ia ki Kali Ar Shaka kiba ym deng Helmet naduh ki nongñiah bad haduh ki nongshong nadien bad kynthup ruh ki Kali kiba ym deng Seatbelts. Lyngba kane ka jingtehpyrkhing ki pulit ki la ioh ban lum khajna lyngba ka e-Challan bad daiñ kuna haduh 63 tylli ki kali, ha kaba ki la ioh lum ïa ka khajna pisa kaba kot sha Rs.77,000.
U SSP ka Ri Bhoi, u V.S Rathore u la ong ba ki Pulit Ri Bhoi ki la kyntu jur ïa ki paidbah ba kin bud ryntih ïa ki kyndon aiñ ñiah kali kumba la buh da ka sorkar.. ” ka tnad Pulit Ri Bhoi ka la kyntu ïa baroh ba kin pyntikna ban bud ryntih ïa ki aiñ ba pyniaid kali, ban lait na ki jingjia aksiden bad ban ioh ia ka jingshngaiñ haba iaid ba ieng ha kane ka surokbah,” la ong u SSP.
U SSP u la pynpaw ruh ba ka tnad Pulit ka sngewkhia ban mih kino kino ki jingjia ba sngewsih bad kan ia bteng pat ban tehpyrkhing ban dain kuna ia kiba pynkheiñ aiñ, khnang ba lah ban tehlakam na ki jingjia ba sngewsih, kaba dei tang na ka daw ka jingpynkheiñ ia ki kyndon aiñ ñiah kali, u la bynrap.
