Nongpoh, K’lyngkot 28: Ban dang pynneh pynsah ia la ka riti ka dustur bad ka leh niam tynrai hapoh ka Raid Marwet ba hap ha ka Hima Mylliemsyiemship ha Ri Bhoi District, ka Raid Marwet mynta ka sngi ki la plie paidbah noh kawei na ka lehniam tynrai ba la tip kum ka lehniam Shad Sohjer, kaba dei ka leh niam ban ainguh ia u Blei Nongbuh nongthaw.
Kane ka lehniam Shad Sohjer bad kaba la tip ruh kum ka Tamasa Sohjer la wan ban plie paidbah da u Bimal Saikia, uba dei u Deputy Chairman ka Mineral development corporation Limited, Meghalaya kum u kongsan bad ha ryngkat ka jingsakhi lang u Syiem ka Raid Marwet u Paiem Ken Syiem, ki longsan ki mansan bad ki khun ki hajar ka Raid Marwet.
Haba sdang kane ka lehniam Sohjer na ka tamasa shad Sohjer, ki la don ruh ki jingiakop bapher bapher naduh ka jingiakop dro dur, ka jingiakop shad tynrai, ka jingiakop rwai tynrai bad kiwei kiwei ki jingiakop, kiba long shi bynta ban pynphuh pynphieng ia kane ka lehniam Shad Sohjer.
Haba kren kum u kongsan ha kane ka sngi, u Bimal Saikia, Deputy Chairman ka Mineral Development Corporation Limited, Meghalaya, u la pynpaw ia ka jingkmen ban ia don bynta ha kaba plie paidbah ia kane ka lehniam Shad Sohjer bad u la pynpaw ruh ba ka jingdon kum kane ka lehniam ka long shi bynta ban pynneh pynsah ia la ki riti ki dustur hapoh kane ka Raid Marwet.
U Syiem ka Raid Mawet u Paiem Ken syiem, kum u syiem u la pynpaw ka jingkmen ba ki khun ki hajar ki la ia snoh kti lang ban pynlong ia kane ka lehniam shad sohjer bad u la pyntip ruh ba mynta ka sngi ki don tang ki jingiakop bapher bapher bad lashai ka dei ka sngi lehniam kyrpang ba ka raid ka ai ia ka nguh ka dem blei ban ioh ia kata ka jingkyrkhu ia ki khun ki hajar ba kin dang bha dang miat bad ruh ba kin dang roi dang par lyngba ka jingkyrkhu jong u Blei Nongbuh Nongthaw.
