Nongpoh, K’lyngkot 27: U bah Bandari Ryntathiang, uba dei u Rangbah Shnong ka Shnong Mawpun Kshaid bad uba dei ruh u President ka Confederation of Ri Bhoi People (CoRP), u la ai khublei kyrpang ia ka sorkar jylla bad ruh ia ka sorkar India halor ka jingshah khot kyrpang sha ka jingrakhe ia ka Republic Day ha Nongbah Delhi.
‘Kum u Rangbah shnong, u la ai khublei kyrpang ruh ym tang ba la shah khot sngewbha ha ka jingrakhe ia ka Republic Day ha Nongbah Delhi bad u la ioh pdiang ruh ia ka khusnam (National Award), kaba dei halor ka jingpyntreikam bha ia ka skhim Jal Jeevan Mission (JJM) lyngba ka Ministry ka Jal Shakti jong ka sorkar India ba la sam ia ka khusnam da u Under Secretary ka Ministry ka Jal Shakti jong ka sorkar India.
U la ai khublei kyrpang ia baroh kiba don bynta ha kaba pyntreikam ia ka skhim kaba la long kaba jop, kata naduh ka tnad PHE, ki nongshong shnong, ka Village Water Sanitation Committee ka shnong, ki ophisar kiba la don bynta ha kaba ia trei lang ban pynlong ia katei ka kam kaba jop bad ruh ka shnong kan ioh pdiang ia kane ka khusnam ba la ithuh da ka sorkar India.
Shuh shuh, kaba kham kongsan tam, ka long ba u ai khublei ia u Blei Nongbuh Nongthaw uba la ialam lynti ba ka shnong kan poi sha kane ka jingithuh da ka sorkar jylla bad ka sorkar India bad kane baroh ka la urlong bad ka la long kaba jop, ka dei namar ka jingdon ka jingiatrei lang na baroh ki liang kynthup ruh ia ka state Institute Rural Development Nongsder, kaba la ju ai ki prorkam ai jinghikai bapher bapher.
