Nongpoh, Kyllalyngkot 28: U District Magistrate ka Ri Bhoi District, lyngba ka bor kaba la pynkup ia u katkum ka kyndon ain jong ka section 163 jong ka Bharatiya Nagarik Suraksha Sanhita, 2023, mynta ka sngi u la pynmih ia ka hukum bad kaba long ka jingmaham pyrshah ia kito ki trai jaka, kiba pynthuh ia ka jingpyntrei kaba dang iaid shaid shaid mynta ka surok Shillong Western By-Pass.
Kane ka jingpynmih hukum da u District Magistrate ka Ri Bhoi, ka dei halor ka kaiphod kaba la la ioh na ka jingujor da ka NHIDCL- PMU Mylliem East Khasi Hills District, ha kaba la ong ba la don ki katto katne ki trai jaka, kiba la pynthut ia ka ka jingpyntrei ia katei ka surok Shillong Western By-pass bad kaba hap ha shnong Nongkyndong, Ri Bhoi District.
U District Magistrate ka Ri Bhoi, u la ong ruh ba kumba ka long mynta, ia ka bai lutksan halor ki jaka ba iaid ka surok Shillong By-pass, la dep lut ban siew bad ba mynta kitei ki bynta ba iaid ka surok Shillong Western By-pass, ki la dei ki jaka jong ka sorkar bad ba kito ki trai jaka, kiba la ioh ia ka bai jaka, kim don hok shuh ban pynwit ha ka jingpyntrei ia katei ka surok, namar ka jingpyntrei ka dei ban iaid beit shakhmat.
Namarkata, lyngba kane ka hukum ia kaba la pynmih da u District Magistrate ka Ri Bhoi, la maham pyrshah ba kino kino ki briew ne ki trai jaka, kiba pynwit ha ka jingpyntrei ia katei ka surok, kin sa ngan ha ki kyndon ain hapoh ka Section 223 of the Bharatiya Nyaya Sanhita 2023.
