Nongpoh, Kyllalyngkot 28: Na bynta ban wanrah ia ka jingiaid beit iaid ryntih ha kane ka Ilekshon ban jied nongmihkhmat sha Khasi Hills Autonomous District Council, u District Magistrate ka Ri Bhoi, u la pynbna ba naduh mynta ka sngi, la pyntreikam ia ka Model Code of Conduct (MCC) ha Ri Bhoi hi baroh kawei.
U District Magistrate ka Ri Bhoi, lyngba ka kyndon ain 163 of the Bharatiya Nagarik Suraksha Sanhita, 2023 ba la pynkupbor ia u, u la pynbna ba naduh ba la pyntreikam ia ka MCC, la khang pyrshah ia kino kino ki briew ba kin rah pisa palat ia ka T. 50 hajar bad nalorkata, la khen beain ruh ban rah Ksiar ne Rupa khlem da don kino kino ki kot jingpynshisha.
Nalorkata, u District Magistrate, u la pynbna ruh ba la khang pyrshah ha ka ban tah ne wah ia kino kino ki Poster ne ki kot, kaba buh ia ki dur ba la ot shiteng, kaba kaba buh ia kino kino ki kynja poster bad banner ha ki jaka paidbah ne ha ki jaka jong ki riew shimet, kaba kynthup ruh ha ki jaka sorkar ne ki bym dei jaka sorkar, khlem da ioh ia ka jingbit na ki bor ba dei ban ai jingbit, ia kaba la khein ia ki ba ki long beain bad ki ban sa ngat ha ki kyndon jong ka Model Code of Conduct.
Shuh shuh, la mana pyrshah ruh ha ka ban rah ia kino kino ki tiar siat ne ki tiar pynbthei, kampher watla ki dei kiba la ioh jingbit (License) ha kylleng ka District, hynrei kane ka kyndon kan ym trei kam ia ki Pulit, Home Guard, ki briew ka tnat Forest, ki BSF lem bad ki birew ka CMPF
Na bynta kito ki briew kiba don ia ki tiar siat ba la don laisen, la kyntu ia ki ba kin leit aiti ne leit buh noh ha ki thanad ba marjan hapoh 14 hadien kane ka jingpynmih hukum.
Namarkata, lyngba kane ka jingpynbna bad lada lap ia kino kino kiba pynkhein ia kitei ki jingmaham, kin sa ngat ha ka jingshah pynshitom katkum ki kyndon ain 223 jong ka Bharatiya Nyaya Sanhita 2023.
