Nongpoh, K’lyngkot 29: Kumba ju long man la u snem na ka bynta ban pynneh pynsah ia ka riti dustur bad ban pan ka jingkyrkhu na u Blei nongbuh nongthaw, ka Raid Marwet mynta ka sngi ka la pynkut noh ia la lehniam Sohjer, kaba dei kawei na ka lehniam tynrai ba la pynlong ha Madan Shnong Baridua.
U Syiem ka Raid Marwet, u paiem Ken Syiem u la shim kum u kongsan ban pyndep ia ka kniah ka khriam bad ka nguh ka dem blei, ha kaba la sakhi lang ruh da ka jingdon lang u Basan Nongkseh u Bah Nathannial Thangkhiew, ki longsan ki mansan ka Raid Marwet bad na ka Hima Mylliem ha ryngkat ki khun ki hajar ka Raid Marwet.
Haba pynpaw halor ka jingthmu kane ka lehniam Sohjer, ka dei kawei na ka lehniam tynrai ban ai ka nguh ka dem blei ia ka Lei Surnia bad ruh ba ka Raid ka kynmaw burom ia ki longsan ki mansan ba kin ioh pdiang ia kata ka jingkyrkhu na u Blei nongbuh nongthaw kaba ki ai nguh ai dem ia ki jingthung jingtep bad khamtam ia u sohnyngkong uba ki la lum la lang na ka rep ka riang.
Na ka laing u Basan Nongkseh, ha kane ka sngi, hadien ka jingleh niam, u la ai ïa ka jingkyrkhu kyrdoh ïa ki khun ki hajar ka Raid ba ki la pyndep ia kane ka lehniam Sohjer bad ryngkat ka jingpan bor na u Blei ba un dang kyrkhu kyrdoh ban bha ban miat ki khun ki hajar ka Raid.
Shuh shuh, ha kane ka sngi, na ka liang u General Secretary ka Raid Marwet Sohjer Committee, u Rajesh Shakwai, u la ai khublei kyrpang ia ki longsan ki mansan, ki khun ki hajar bad ruh u Syiem ka Raid Marwet bad baroh kiba la don bynta ban pynlong ia kane ka lehniam sohjer kaba jop.
