Nongpoh, K’lyngkot 30: U Dr. D.D Lapang kum u kñi rangbah ka Kur Lapang, haba kren mynta ka sngi ha ka jingiakynduh lang kaba 7, jong ka Seng Kur Lapang Pyllun 2025, kaba la long ha Madan Umdihar ha Ri Bhoi, u la kyntu ia ka Kur Lapang ba kin long kiba sngewrit, namar dei tang ka jingsngewrit kaba lah ban wan rah ia ka jingiatylli bad ka jingiatehsong hapoh ka Kur Lapang.
Kane ka jingiakynduh lang ka Kur Lapang, ka dei kaba la ju long man la u snem bad mynta ka la poi sha ka kynti kaba 7, ha kaba la don lang u Dr. D. D Lapang, uba long u kñi rangbah ka kur Lapang bad ha ka jingkren u la pynpaw ia ka mynsiem jong ka jingkmen ba haduh kine ki sngi ka Kur Lapang ka dang ia tehsong bad ia tylli kawei ban tei ia ka bha ka miat jong ka kur Lapang.
Kum ka jingkyntu kynpham, u Dr. D. D Lapang, u la kyntu ruh ia ki longkmie, ki longkpa, ki samla bad ki khynnah kiba dei na ka kur Lapang ba kim dei ban don ka mynsiem sngew sarong bad ki dei ban don kata ka mynsiem sngewrit ban trei ia la ka kam bad ban tei ia la ka ïing ka sem kaba skhem khnang ba kan long ka nuksa ia ka jaid bynriew Khasi jongngi
Shuh shuh, u la ai mynsiem ruh, da kaba ong ba ka kyntien bym lah, kam dei ban rung ha ka jingmut jingpyrkhat ka Kur Lapang bad kano kano ka kam kaba ngi trei ka dei ban long kaba jop, namar lada ngi don ia kata ka thong ha ka jingim ngin poi sha kata ka thong kaba ngi angnud.
Ha kane ka sngi, la pynphuh pynphieng ruh da ki jingrwai na ki Unit bapher bapher ka Kur Lapang bad ruh la pynkup bor ruh ia ki nongialam ba thymmai ka Kur Lapang na ka bynta u snem 2025-2028 kiba kynthup ia u President u Bah Tynshain Lapang, Vice president Kendrowell Lapang, Baiateilang Lapang, Chief adviser Dr. D.D Lapang, Adviser J.W Lapang, General Secretary Albertus Lapang lem bad kiwei kiwei ki nongialam bad ki dkhot ka seng kur Lapang.
