Nongpoh, Rymphang 28: Kum ka jingbteng bteng ba ia khun thma pyrshah ia u drok bad da ka jingioh lum jingtip kaba bniah, ki Pulit ka Ri Bhoi hynnin ka miet ki la ioh ban kem ia uwei u nongkhaïi drok, uba wan na Guwhati ban kiew sha Shillong da kawei ka Kali tourist katba u dang poi ha Mawtnum ba hap ha ka surokbah National Highway-6 ha Ri Bhoi District.
Une u nongkhaïi drok la tip kyrteng kum u Rajat Paul na ka jylla Assam bad ki pulit ki la pynlong ia ka jingpynap shrip, ka dei hadien ba ki la ioh jingtip kaba bniah ba u dei u nongkhaïi drok.
Kumba la pyntip da u Heh Pulit ka Ri Bhoi, u V.S Rathore, la ong hadien ba la ioh jingtip kaba bniah la pynlong ia ka jingpynap shrip ha Mawtnum bad ban bat ia kawei ka Kali Tourist ba la shong da utei u nongkhaii drok bad ha ka jingkhynra na utei u nongkhaïi drok la la ioh kurup haduh 36.3 gram u drok Heroin bad la kurup ruh ia kawei ka Mobile phone ba la leh katkum ki kyndon jong ka NDPS Act, 1985.
U la ong ruh, hadien ba la ioh kurup ia u drok, la kem noh ia utei u nongkhaïi drok ban pynlong ia ka jingtohkit kaba bniah bad ruh la dep ban register case pyrshah ia u, katkum ka NDPS Act, 1985, ha kaba mynta ka sngi la rah noh ia u sha ïing bishar jong ka District Court ha Ri Bhoi.
Shuh shuh, u heh Pulit ka Ri Bhoi, u la iathuh ruh ba ka jingtohkit halor kane ka jingioh kem drok ka dang iaid shakhmat bad khmih lynti ruh ban dang ioh kem ia kiwei kiba don kti ha kane ka kam, u la bynrap.
