Shillong, Rymphang 27: U Bah Shemborlang Rynjah, u MDC na Langkyrdem-Laitkroh bad u Bah Strong Pillar Kharjana na Mawkhar-Pynthorumkhrah na ka party VPP da kaba suk ba saiñ kin sa shimti kum u Chief Executive Member (CEM) bad u Chairman ka Khasi Hills Autonomous District Council (KHADC) ha ka election ka ban sa long lashai ka sngi ka 28 tarik u Rymphang 2025 hapoh ka KHADC.
U Bah Shemborlang Rynjah bad u Bah Stong Pillar Kharjana kin sa thep kyrteng ryngkat na ka bynta ka post CEM bad ka post Chairman, kaba dei hadien ba mynta ka sngi ki la pyndep ia ka jingbam smai kum kita ki MDC ba thymmai hapoh ka KHADC.
“Na ka jingbishar bniah ia ki kot thep kyrteng (Nomination Papers), la shem baroh ar ngut ki kot ki sla ki la biang bad la pdiang, namar ym shym la don kiwei pat kiba ia khun lait noh tang u Bah Rynjah bad u Bah Kharjana” ong u Secretary ka KHADC, u Bah S. Sohtun sha ki nonglum khubor.
Kumba la paw, ka VPP ka la rai ban thaw ia ka Executive Committee tang 8 ngut ki dkhot kynthup ia u CEM khnang ban pynduna ia ka jinglut jingsep hapoh ka KHADC.
Kum ka jingpyntip paidbah, ka election ban jied ia u CEM kan long ha ka sngi Thohdieng ha ka por 2 baje noh phai sngi, kaba dei hadien ka election ban jied ia u Chairman ka KHADC ha ka por 11 baje mynstep.
La ioh lum jingtip ruh ba ka VPP ka la rai ruh ban thung ia u MDC ka Mawhati, u Bah Kynjohlang Rangtong na ka bynta ban ia khun ia ka psot Deputy Chairman hapoh ka KHADC.
Shuh shuh, ka tyllong khubor ba la ioh lum, ki Executive Members (EM) ba ka VPP kan thung ki kynthup ia u MDC ka Mawthadraishan u Bah Powell Sohkhlet, u MDC ka Nongthymmai u Bah Winston Tony Lyngdoh, u MDC ka Mawkyrwat u Bah Pynkhraw Kharjarin, u MDC ka Mawkynrew u Bah Seiborlang Warbah, u MDC ka Umroi u Bah Isynei Hinge, ka MDC ka Mylliem ka Kong Aibandaplin L. Nonglait bad ka Kong Deiti Majaw MDC ka Laitumkhrah-Malki.
