Nongpoh, Lber 08: Ki bynta ba shaneng jong ki katto katne ki building ka ICAR bad kiba don ha ki bynta ba shaneng bad marjan bad ka khlaw, mynta ka janmiet ki la jan kem ding bad kata ka dei na ka jingpur jong ka ding kaba la wan na kawei ka jaka, ia kaba la thang da ki riew thang khlaw dusmon.
Katei ka jingjia, ka la jia mynta ka sngi ha ka por 2 baje eiei janmiet, ha kaba na katei ka jingjia ba pluh ka ding, ka la pynlong ia ki nongtrei kiba trei ha ICAR bad kiba trei marjan bad katei ka jaka ba wan pur ka ding, ba ki la hap ban mih na ki jaka ba ki trei bad ba ki la hap ban leit pynlip bad ban pynkhuid ia ki jaka ba kham long khlaw, khnang ba ka ding kan ym pur sha ophis.
Ki nongtrei ha ICAR, ki la ong ruh ba shu donbok ba katei ka jingjia pluhding ka la jia ha ka por ba ka jingbeh lyer ka la kham duna, hynrei jin lada ka dei ha ka por ba dang jur ka Lyer, kaba mut ba ym lah shuh ban tip kumno kan jia bad kaba lah ban wanrah ia ka jingpluh ha ICAR.
Ia ka ding la lah ban tem noh tang da ki nongtrei jong ka ICAR bad kat haduh ba la jan dep ban pynlip ia ka ding, ym pat iohi kali pynlip ding, ia kaba lehse ki nongtrei hapoh katei ka jaka, ki khlem pyntip shuh sha ki briew ka kali pynlip ding, namar ba ki la sngewthuh ba katei ka ding kam poi shuh sha ki bynta jong ki building kiba don ha ICAR.
