Nongpoh, Lber 07: Ki khynnah skul na kylleng ki jylla shatei lam mihngi ka ri India ki la pynpaw ïa ka mynsiem jong ka jingsngew muja, kaba dei hadien ba ki la ioh ban shim bynta ha ka tamasa kaba lai sngi ba la tip kum ka “Three Day Festival- Nurturing Young Minds for the 21st Century Learning Skils’ ba la pynlong ha North Eastern Regional Institute of Education (NERIE-NCERT), Umiam.
Ïa kane ka tamsa la pynkut noh mynta ka sngi ha kaba la sakhi haduh 300 tam ki khynnah skul na ki jylla shatei lam mihngi ka ri India ki la wan ban shim bynta ha kane ka tamasa ban ioh lum jingtip bad ruh ban pynpaw ïa ki sap bapher bapher ba ki don kum kita ki khynnah skul ha kane ka juk 21st century.
Ka Prof. Flourette G. Dkhar (In-charge Principal, NERIE), ka la pynpaw ba ka jingthmu ba hakhmat eh kane ka tamasa ka long ban ai lad na ka bynta ki khun samla kum ka rynsan kaba ki lah ban pyni ïa kita ki sap ha ki bynta bapher bapher bad ruh ban ailad ba kin ioh ban ïa thir na ïa tai ban pynjanai ïa ka jingnang jingstad ha kum kane ka juk jong ka 21st Century. Ha kane ka tamasa la pynshongdor ruh katkum ki nongrim jong ka National National Education Policy (NEP) 2020.
Kum ban pynkynmaw, ka NERIE ka dei kawei na ka shlem ai jingnang jingstad kaba saindur ïa ka pule ka puthi bad khamtam ban ai jinghikai kyrpang ïa ki nonghikai bad kane ka tamasa ka plie lad plie lynti kumjuh ïa kiba la nang la stad ba kin ioh lad ban ïa don bynta bad ki khynnah kumno ban pynphrung ïa kata ka bor pyrkhat jong ka jingnang jingstad ha ki khynnah.
Kane ka tamasa ka ban khia hallor ka jingdon sap kyrpang ki khynnah ha kane ka pyrthei stad ba mynta ba kynthup ha ka bor pyrkhat bad weng ïa ki jingeh, ban tih bniah halor ka jingpule ïa ka saïan bad ka jingkheiñ bad kumjuh ruh ha ki bynta bapher bapher ban pynshlur ïa ki khynnah ka juk mynta.
Haba pynkut mynta ka sngi ïa kane ka tamasa, la sam ruh ïa ki khusnam sha ki khynnah skl kiba la shim bynta ha ki prokram bapher bapher jong kane ka tamasa.
Ka Flourette G Dkhar, Principal ka North East Regional Institute of Education, Shillong, kaba dei ka shnat jong ka NCERT, ka la ong katkum ka thong ka sorkar ‘Viksik Bharat’, ki wan rung ha ki jingmut jingpyrkhat jongka kumno ban saindur ïa ka lawei ki khynnah, ka la pyrshang ruh ban thaw ki lad ki lynti, hynrei ki jingwrai ba la rwai bad shna hi da ki khynnah ka pyni shisha ba ka don ka bork aba ki lah ban pyntreikam bad ka iohi shisha ruh ïa ka jingrhem mynsiem, ka jingkmen bad ka jingkwah ki khynnah ban lum ïa kata ka jingnang jingstad.
