Nongpoh, Lber 08: Ban pynsuk ia ki paidbah bad ban ioh jingshai kaba bniah ha ka rukom treikam jong ka ophis u Deputy Commissioner ka Ri Bhoi, ka bor synshar District jong ka Ri Bhoi District ka la buh kyrpang da ka Help Desk ha ophis u Deputy Commissioner, ryngkat bad ka helpline number kaba kyrpang, kaba lah ban pyndonkam na ka bynta ki jingkylli, ki jingpynshai, jingpan jingiarap, bad ki jingud jingnam kiba iadei bad ki kam paidbah bad ki jingshakri ba dei ban ai da ka ophis u Deputy Commissioner.
Ia kane ka Help Desk la plie da u Deputy Commissioner ka Ri Bhoi, u Abhilash Baranwal ryngkat ka jingdon lang ka Additional Deputy Commissioner ka Ri Bhoi, ka Kong Balakyntiew Rani lem bad ka jingsakhi ki nongtrei sorkar. la buh ruh ia ka helpline lyngba ka whatsapp number 8131811911, ka ban sdang trei kam naduh ka 10 tarik u Lber 2025, ha ki sngi ba long trei naduh 10:00 AM haduh 5:00 PM
Kane ka Help Desk kan iarap kyrpang ia ki paidbah kiba kynthup ia ki jingkylli kiba iadei bad ki skhim, ki program bad ki jingshakri bapher bapher jong ka District Administration, ka jingai jingngtip shaphang ka jingdon ki staff ne ki ophisar ha ka ophis u Deputy Commissioner bad kiwei ki ophis kiba ia treilang. jingpynshai halor ki ki jingthoh/jingud kiba la aiti ha ka ophis u DC, ka jingiarap halor ki rukom treikam ki kot ki sla ba donkam, bad ki jingdonkam ba kynthup ha ki skim bad ki jingshakri bapher bapher, ka jingpdiang ia ki jingud bad ki jingai jingmut ki paidbah ha ka ophis treikam u DC
Shuh shuh, ka District Administration ka angnud ban ai jingshakri kaba ryntih bad kaba biang por lyngba kane ka helpline, ban pynsuk ia ki paidbah ba kin ioh jingtip bad jingshakri khlem donkam ban wan mih man la ka por ha ophis. Kumta, la kyntu ïa ki paidbah ban pyndonkam bha ïa kane ka lad bad ban ai jingmut na ka bynta ban pynbha shuh shuh ïa ki jingshakri ba ka ophis u Deputy Commissioner ka ai sha ki paidbah.
