Shillong, Lber 13: U Myntri rangbah ka jylla, u Conrad K. Sangma mynta ka sngi u la ai ka jingpynshai ha ka dorbar mang tyngka, kaba dei halor ka jingioh nam ka Byrnihat kum kata ka jaka ba jaboh tam ka lyer ha ka pyrthei, kaba dei katkum ka World Air Quality Report 2024 ba la pynlait da ka Swiss firm IQAir.
Kum u myntri rangbah u la pynpaw ba ka sorkar jylla ka sngewkhia halor kane ka jingshah ktah ban ioh ia ka nam kum kata ka jaka ba jaboh tam ka lyer ha ka pyrthei bad na ka liang ka sorkar ruh ka la shim khia bha ban thaw ia kita ki lad ki lynti ban pynduna ia kane ka jingjaboh jong ka lyer kaba lah ban ktah ia ka koit ka khiah ki paidbah.
U la iathuh ruh dang shen ka Meghalaya State Pollution Control Board, ka la pynlong ia ka jingjurip ia ki Karkhana ha 13mer bad haduh 7 tylli ki Karkhana ki la shah khang, na ka daw ba kim bud ia ki kyndon kiba dei ban iada na ka jingpynmih ia ki lyer jaboh.
U la ong ruh ba kum u myntri rangbah ka jylla, u la dep phah ruh ban phah da ka jingthoh sha u Myntri rangbah ka jylla Assam u Himanta Biswa Sarma ban thaw ia ki lad ki lynti na ka bynta ban pynkhuid biang ia ka lyer jaboh, namar ka Byrnihat ka dei kaba don ha khappud ka Assam ba bun ki Karkhana ka Assam ruh ki don kiba lah ban ktah ruh na ka jingpynmih lyer jaboh na kaitei ki Karkahana na Assam bad na Meghalaya.
U la pynpaw ruh da kaba ong ba ba u la ia mir jingmut bad u myntri rangbah ka jylla Assam ban thaw syndon da kata ka joint action plan, kiba long ki lad ki lynti ban pynduna ia kane ka lyer jaboh, da kaba kin hap ruh ban khot ia ki riew shemphang kiba tip bha halor kane ka kam (expert).
Shuh shuh, u la ong ruh ba ka sorkar ruh ka sngewkhia halor kane ka bynta bad ka la shim khia bha ban weng noh ia kane ka jingioh nam ka Byrnihat kum ka jaka ba jaboh tam ka lyer ha ka pyrthei. Ka sorkar kan thaw iaki lad ki lynti ban iatrei ryngkat ryngkat bad ka sorkar Assam bad ka sorkar Meghalaya khnang ban lah ban weng ia kane ka jingeh kaba ktah na ka jingioh nam jong ka lyer ba jaboh tam ha ka pyrthei ha Byrnihat.
