Meghalaya, Jylliew 7:
Ka jingiaknieh bor hapdeng ka Hima Nongmynsaw Syiemship bad u Sirdar barim jong ka shnong Langpih ban lum khajna na ka iew Langpih ka la jan poi shaduh u pud jong ka jingia-umsnam, naba kitei baroh ar ki kynhun, ki la ieng halor ka jong ka nongrim ban ioh khrong ia ka khajna na katei ka iew.
Katkum ka khubor kaba la iohlum, la iathuh ba kane ka jingjia ka la sdang nyngkong ha ka por ba ki nonglum bai musur jong ka Hima Raid Nongmynsaw Syiemship ki la shah pynsangeh ha u Bah Hendro Samakha bad ka kynhun ka jong u ban lum khajna na katei ka iew Langpih.
Kane ka jingleh jong utei u Bah Hendro Samakha kala wanrah ia ka jingiania kaba la khluit tar pyrshah bad ki nonglum bai musur ka Hima Raid Nongmynsaw Syiemship kat haduh ba ki hap ban phet syndon na katei ka jaka ban lait mih kino kino ki jingjia ba sngewsih.
Shuh shuh, la ioh jingtip ruh tang hadien kumba katto katne por, kitei ki nonglum bai musur ka Hima Raid Nongmynsaw Syiemship, ki la leit biang ban khrong ia ka bai musur na katei ka iew Langpih ha ryngkat ka jingsynran jong ki pulit pahara, bad ha kane ka sien ruh, utei u Hendro Samakha ryngkat tang mar ia ioh jingtip, u la wan mih biang ryngkat bad ka kynhun ban khanglad ia ka Hima Raid Nongmynsaw.
Na ka liang u Bah Phlowel Syiem, Acting Syiem ka Hima Raid Nongmynsaw Syiemship haba kren ha kane ka sngi u la ong ba ong ba ka Hima ka la leit ban lum bai musur kaba dei ka hok bad ka iktiar kaba ka District Council kala pynkupbor ia ka Hima bad ong ruh ba kane ka jingpynibor jong u ‘riewshimet ka long kaei kaei ka bym lah ban pdiang satia. Halor kane ka jingjia utei u Acting Syiem ka Hima Raid Nongmynsaw Syiemship u la iathuh ruh ba ka Hima kan sa leit ban ai da ka jingthoh sha ki bor jong ka District ban tuklar halor kane ka kam.
Haba ioh pat ban iakren bad utei u Bah Hendro Samakha, u la ong ba ma u lem bad ka kynhun, ki nym shah da lei lei ruh ban ka Hima Raid Nongmynsaw Syiemship kan lum khajna naba kam dei satia ka hok ka jongki, wat lada ia ka iew la seng da katei ka Hima, hynrei kadei pat ha ka por kaba ma u, u bat kum u Sirdar jong ka shnong Langpih.
