Chandigarh, Jylliew 7:
Uwei na ki nongrwai ba pawnam ka karkhana phlim Bollywood, u Vishal Dadlani u la kular ban ai kam ia kawei ka pulit langrut jongka Central Industrial Security Force (CISF) kaba la donkti ban thap ia ka actress Kangana Ranaut, kaba dei ka MP ba dang shu jop jong ka seng Bharatiya Janata Party (BJP) na Mandi Parliamentary constituency jong ka jylla Himachal Pradesh.
Kum ban shu kdew hangne, ka actress Bollywood, ka Kangana Ranaut ha ka 6 tarik jong u bnai Jylliew, 2024 ka la shah thap ha kawei ka pulit langrut jong ka CISF ha Chandigarh Airport shwa ba kan leit ka ka nongbah New Delhi halor ka jingkren pyrshah ka jongka ia ka jingiakhih ki nongrep ha u snem 2020 ha kaba katei ka pulit langrut kaba la tip kyrteng kum ka Kulwinder Kaur ka la ong ba katei ka actress ka la ong ba ‘ki nongrep ki leit ban iakhih naba ki ioh T. 100, hato ma ka kan leit ban shong iakhih lang? ka kmie jong nga ka don bynta ha katei ka jingiakhih, ha kapor ba kane ka actress ai jingkren ha kato ka por’ la ong ka Kulwinder Kaur.
Kum ban shu kdew hangne, ka Kangana Ranaut, ha u snem 2020, ka la thoh ha ka sla X (Twitter) ka jongka ba ki nongkhih ba lam khmat da ki nongrep, kimdei satia ki nongrep, hynrei kidei kiba la shu ai da ka pisa T. 100 ban leit iakhih, bad kynnoh ruh ba kine ki nongiakhih kimdei satia ki nongrep, hynrei kidei ki lehnoh lane ki nongpyntriem kiba pyrshang ban pyniapaid iapra ia ka ri India.
Katei ka jingkren jong katei ka actress Bollywood ba pawnam, ka la ktah shikatdei ia katei ka Kulwinder Kaur kaba la shu ap khmih lynti lano kan ioh ia kane ka lad ban ai jingsneng, bad ei tad haduh hynnin ka sngi ba katei ka acress Bollywood, katba ka dang thmu ban leit sha ka nongbah New Delhi.
Hadien ka jingsaphriang katei ka khubor, uwei na ki nongrwai ba pawnam ka Bollywood, u Vishal Dadlani u la mih shakhmat ban ai ka jingkyrshan ia katei ka pulit langrut da kaba ong ba ‘ngam kyrshan ia ki kam sniew ne thombor, hynrei lada katei ki bor ba dei khmih jong ka CISF ki weng kam iaka, nga kloi ban aikam iaka lada ka pdiang’
