Florida, Lber 19: Ki arngut ki stad pule hawhaw lane ki Astronaut ba kynthup ia ka Sunita William bad u Butch Willmore kiba la sahkut la kumba 9 bnai tam eiei halor ka International Space Station, mynta ka step ki la lah pat ban wanphai bad hiar suk sha ka sla pyrthei hadien ba ka liengsuin hawhaw Spacecraft, SpaceX Dragon Capsule ka la hiar da kaba suk ha ka por 3 shiteng eiei mynta ka step ha ka Duriaw jong ka Florida hajan ka Tallahassee.
Ha kane ka jingwan phai sha ka pyrthei jong ka Sunita William bad u Butch Willmore, la synranlang ia ki da u Nick Hague bad u Allsandr Grebyonkin kiba leit sha ka international space Station ha u bnai Nohprah 2024 ha ka jingpyrshang ban leit iarap ban ioh pynphai biang sha sla pyrthei ia ki arngut ki Astronaut kiba la sahkut naduh u bnai Jylliew 2024.
Lah ban kdew, ba ka Sunita William bad u Butch Willmore kiba la leit sha hawhaw ISS ha u bnai Jylliew 2024 tang na bynta 8 sngi hynrei na ka daw ka jingthut noh ha ki bynta jong ka liengsuin hawhaw ka Boeing Starliner ki la hap ban sahkut noh ha hawhaw la kumba 9 bnai watla hapdeng ka jingpyrshang kiba bun na ka liang ki bor ka National Aeronautics and Space Administration (NASA).
Ha kane ka jingwan hiar biang sha ka sla pyrthei jong ka kynhun Crew 9 kaba la shimpor kumba 17 kynta eiei , la sakhi ia ka durkhmat phuh samrkhie bad ka jingkmen kaba khraw hapdeng kine ki ar ngut ki stad pule hawhaw hadien ba ki la mih napoh ka jaka shong (capsules) bad la ialam noh ia ki ban leh pat ia ka jingkhmieh bniah ia ka koit ka Khiah jong ki.
